নিয়মীয়া বাৰ্তা,১৮ মাৰ্চঃ ১১৪ নং জোনাই বিধানসভা(জনজাতি)সমষ্টিৰ বিজেপি মিত্ৰজোঁটৰ প্ৰাৰ্থী ভুৱন পেগুৰ সমৰ্থনত অহা ২০ মাৰ্চত চিমেন চাপৰিৰ সতীশ বসুমতাৰী বড়ো হাইস্কুল খেলপথাৰত এখন নিৰ্বাচনী সভাত অংশগ্ৰহণ কৰিব অসমৰ মুখ্যমন্ত্ৰী সৰ্বানন্দ সোণোৱালে।
উপ আঞ্চলিক দল সন্মিলিত গণশক্তিৰ একমাত্ৰ বিধায়কগৰাকীয়ে অলপতে বিজেপি দলত যোগদান কৰাৰ পাছত বিজেপি মিত্ৰজোঁটে মনোনীত প্ৰাৰ্থী হিচাপে ভুবন পেগুক প্ৰক্ষেপ কৰিছে জোনাই বিধানসভা সমষ্টিত।
ফলত বিজেপি দলীয় টিকট লাভৰ পৰা বঞ্চিত হ’ব লগা হ’ল কেবাগৰাকী পুৰণি বিজেপি।বিজেপি টিকট বঞ্চিত মাধৱ মুছাহাৰীয়ে এইবাৰ ৰাইজৰ দলৰ পৰা প্ৰাৰ্থিত্ব আগবঢ়াইছে। যোৱা ৭ মাৰ্চতো বিজেপিৰ নেডাৰ আহ্বায়ক ড০ হিমন্ত বিশ্ব শৰ্মাই জোনাইৰ পৰা চিলাপথাৰলৈ বিশাল বাইকৰেলীত অংশগ্ৰহণ কৰি চিলাপথাত এখন নিৰ্বাচনী সভা সম্বোধন কৰি গৈছে।
মাজুলী, ধেমাজি,শদিয়াকে ধৰি কেবাটাও মিচিং বসতিপ্ৰধান অঞ্চলৰ ভোটাৰৰ সমৰ্থন লাভৰ অংকতেই পুনৰ ২০ মাৰ্চত ভুবন পেগুৰ উদ্ধাৰৰ বাবে নিৰ্বাচনী প্ৰচাৰত নামিব মুখ্যমন্ত্ৰী সৰ্বানন্দ সোণোৱাল।
ইতিমধ্যে সতীশ বসুমতাৰী বড়ো হাইস্কুল খেলপথাৰত বৃহৎ পেণ্ডেলৰ কাম তীব্ৰ গতিত আৰম্ভ কৰা দেখা গৈছে।বিজেপি মিত্ৰজোঁটৰ অংশীদাৰী দল গণশক্তি,অগপৰ লগতে মিত্ৰজোঁটৰ প্ৰাৰ্থীক সমৰ্থন আগবঢ়োৱা বড়ো জাতীয় সংগঠনৰ নেতৃত্বই নিৰ্বাচনী সভাখন সফল কৰি তুলিবলৈ জোৰদাৰ প্ৰচাৰ চলাইছে।