নিয়মীয়া বাৰ্তা, ২০ আগষ্টঃ আমচৈ নিবাসী সমাজ সেৱাৰ লগত ওতঃপ্ৰোত ভাৱে জড়িত মৰিগাঁও জিলাৰ দেওশাল গাঁও পঞ্চায়তৰ সচিব হিচাপে কর্মৰত টঙ্কেশ্বৰ কলিতাই (মণি) মৰিগাঁও জিলাৰ ভিতৰত শ্ৰেষ্ঠ কভিড -১৯ যোদ্ধা হিচাপে স্বীকৃতি লাভ কৰাত সকলো আমচৈবাসীয়ে উৎফুল্লিত হোৱাৰ লগতে কর্মী গৰাকীক অভিনন্দন জ্ঞাপন কৰিছে।
যোৱা ৭৪সংখ্যক স্বাধীনতা দিৱসৰ দিনা শ্ৰেষ্ঠ কভিড -১৯ যোদ্ধা হিচাপে সম্বর্দ্ধনা লাভ কৰা পঞ্চায়ত সচিব টঙ্কেশ্বৰ কলিতাক ১৯ আগষ্টত মৰিগাঁও জিলাৰ উপায়ুক্ত ৠতুৰাজ বৰাই প্ৰশস্তি পত্ৰ প্ৰদান কৰে। মৰিগাঁও জিলাৰ উপায়ুক্তৰ হৈ টঙ্কেশ্বৰ কলিতাক আনুষ্ঠানিক ভাৱে এই প্ৰশস্তি পত্ৰ প্ৰদান কৰে মৰিগাঁও জিলা পৰিষদৰ মুখ্য কাৰ্যবাহী বিষয়া কিশোৰ ঠাকুৰীয়াই।