নিয়মীয়া বাৰ্তা ৭ ছেপ্টম্বৰঃ পলাশবাৰী থানাৰ অন্তর্গত দখলাত কালি নিশা কামৰূপ জিলা আৰক্ষীয়ে দুর্ধর্ষ মটৰচাইকেল তথা গৰু চোৰ নেকিবুৰ ৰহমান ওৰফে নকুলক এনকাউণ্টাৰ কৰা ঘটনাই অঞ্চলটোত চাঞ্চল্যৰ সৃষ্টি কৰিছে৷ জানিব পৰা মতে, উত্তৰ পাৰৰ এক স্থানত আৰক্ষীয়ে এখন চুৰি মটৰচাইকেলসহ আটক কৰাৰ পাছতে আৰক্ষীৰ জিম্মাৰ পৰা নেকিবুৰে পলায়নৰ চেষ্টা কৰিছিল৷ পাছত নেকিবুৰক দখলালৈ অনা হৈছিল৷ কিন্তু দখলাত আৰক্ষীৰ জিম্মাৰ পৰা অস্ত্র কাঢ়ি পুনৰ পলাবলৈ চেষ্টা কৰোঁতেই আৰক্ষীয়ে দুর্ধর্ষ গৰু চোৰজনক ভৰিত গুলীয়ায়৷
গুলীবিদ্ধ নেকিবুৰক নিশাই মহানগৰীৰ ৰাণী সামূহিক চিকিৎসালয়ত প্রাথমিক চিকিৎসা কৰাৰ অন্তত গুৱাহাটী চিকিৎসা মহাবিদ্যালয় হাস্পতালত ভর্তি কৰায় আৰক্ষীয়ে৷ নেকিবুৰ বিজয়নগৰ হালীগাঁৱৰ দুর্ধর্ষ গাডী চোৰ বগাৰ সহযোগী আছিল৷ এই কথা সদৰী কৰে কামৰূপ জিলাৰ আৰক্ষী অধীক্ষক হিতেশ ৰয়ে৷ এখন সংবাদ মেলত আৰক্ষী অধীক্ষকজনে প্রকাশ কৰা মতে বকো থানাৰ অন্তর্গত সোণতলী আৰক্ষী চকীত নেকিবুৰৰ বিৰুদ্ধে ৰুজু হৈ থকা গোচৰত গ্রেপ্তাৰ কৰিছিল৷ ঘটনা সন্দর্ভত ইতিমধ্যে সোণতলী আৰক্ষী চকীয়ে পলাশবাৰী থানাত দাখিল কৰিছে এজাহাৰ৷ চোৰজনৰ পৰা এখন মটৰচাইকেলো জব্দ কৰে আৰক্ষীয়ে৷ বকো থানাৰ গুলীবিদ্ধ অভিযুক্ত নেকিবুৰৰ ঘৰ মণ্ডিৰাৰ বৰুৱাপথাৰত৷