নিয়মীয়া বাৰ্তা, ২৯ মেঃ সমগ্র ৰাজ্যত ড্রাগছ সাম্রাজ্যৰ শিপা ইমান গভীৰলৈ বিয়পি আছে যে অসম আৰক্ষীৰ ধাৰাবাহিক অভিযানেও তাৰ আঁত পাবলৈ সক্ষম হোৱা নাই৷ অসমত দীর্ঘদিনৰ পৰা চলি থকা এই বিয়াগোম ক’লা সাম্রাজ্য উৎখাত কৰিবলৈ যোৱা দিনকেইটাত সর্বশক্তিৰে নামি পৰিছে আৰক্ষী বাহিনী৷ এই সময়ছোৱাত অভিযানকাৰী আৰক্ষীৰ সন্মুখত আহি পৰিছে আশ্চর্যজনক কেতবোৰ তথ্য৷ এই তথ্য অনুসৰি ম্যানমাৰৰ পৰা মণিপুৰ হৈ অসমলৈ অহা ড্রাগছ বিক্রীৰ দায়িত্বত নিয়োজিত হৈ আছে অসমৰ বহুসংখ্যক জীয়াৰী–বোৱাৰী৷ আনকি একো একোটা পৰিয়ালৰ জীৱিকাৰ প্রধান সম্বলত পৰিণত হৈছে নিষিদ্ধ নিচাযুক্ত সামগ্রীৰ ব্যৱসায়৷ মহিলা পেডলাৰৰ জৰিয়তে বিয়পি পৰা এই নেটৱর্কে ৰাজ্যখনৰ নতুন প্রজন্মটোৰ এটা বৃহৎ অংশক নিশ্চিত ধ্বংসৰ গৰাহলৈ ঠেলি দিছে৷ ‘লেডী ডন’ৰ বিৰুদ্ধে অভিযান চলাবলৈ গৈ বহু সময়ত বিপদতো পৰিলবগীয়া হৈছে আৰক্ষী৷ অসমৰ চুকে–কোণে ড্রাগছৰ ব্যৱসায় বিয়পাই দিবলৈ মহিলা–যুৱতীক ড্রাগছ মাফিয়াসকলে ব্যৱহাৰ কৰা ঘটনাই ৰাজ্যৰ গৃহ বিভাগকো চিন্তিত কৰি তুলিছে৷
উল্লেখ্য যে ২০২০ চনৰ ২৯ জুলাইত পল্টনবজাৰত আৰক্ষীয়ে গ্রেপ্তাৰ কৰিছিল মণিপুৰৰ সংগীতাৰাণী দেৱী নামৰ মহিলাগৰাকীক৷ তেওঁৰ ঘৰৰ পৰা বৃহৎ পৰিমাণৰ ড্রাগছৰ লগতে ৭৪ লাখ টকাৰ নগদ ধনো জব্দ কৰা হৈছিল৷ সেই সময়ত কোৱা হৈছিল যে অসমত চলি থকা ৯০ শতাংশ ড্রাগছ ব্যৱসায়ৰ লগতে এই মহিলাগৰাকী জড়িত৷ সেই বাবেই ৰাজ্যপালে অভিযুক্ত সংগীতাৰাণী দেৱীয়ে এবছৰলৈ জামিন পাব নোৱাৰাকৈ তেওঁক কাৰাগাৰলৈ প্রেৰণ কৰে৷ পৰৱর্তী সময়ত এই গোচৰটো নার্ক’টিক কণ্ট্ৰ’ল ব্যুৰ’লৈ হস্তান্তৰ কৰা হয়৷ কিন্তু সংগীতাৰাণী দেৱী নামৰ ‘লেডী ডন’গৰাকীৰ গ্রেপ্তাৰৰ পাছতো অসমৰ ড্রাগছ সাম্রাজ্য পূর্বৰ ৰূপতে চলি থাকে৷ শেহতীয়াকৈ মুখ্যমন্ত্রী ড০ হিমন্ত বিশ্ব শর্মাৰ নির্দেশত আৰক্ষীয়ে এই নেটৱর্ক উৎখাত কৰিবলৈ সর্বশক্তি প্রয়োগ কৰিছে৷
শুকুৰবাৰে মুখ্যমন্ত্রী ড০ শর্মাই সদৰী কৰা মতে, কালিৰ দিনটোত ড্রাগছ ব্যৱসায় সন্দর্ভত মুঠ ২৫টা গোচৰ ৰুজু হোৱাৰ লগতে গ্রেপ্তাৰ হৈছে ৩৮জন সৰবৰাহকাৰী৷ অভিযানৰ সময়ত আৰক্ষীয়ে ৫২৬.৬১ গ্রাম হেৰ’ইন, ৫ কেজি গাঞ্জা, ৫৯ বটল কফ ছিৰাপ, ৩৪,৮০০ টেবলেট, ৭ গ্রাম মৰফিন আৰু ৩.৮৯ লাখ টকা জব্দ কৰে৷ ইফালে গুৱাহাটীতো শুকুৰবাৰে ক্রাইম ব্রাঞ্চে লালগণেশৰ পৰা জিণ্টু মণ্ডল (২৫) নামৰ এজন ড্রাগছ সৰবৰাহকাৰীক গ্রেপ্তাৰ কৰে৷ আৰক্ষীয়ে ধৃত যুৱকজনৰ পৰা ৬ গ্রাম নিচাযুক্ত সামগ্রীৰ লগতে ১.৭০ লাখ টকাও জব্দ কৰে৷ গড়চুকতো আৰক্ষীয়ে ৯টা কনটেইনাৰ, নগদ ১০ হাজাৰ টকাসহ বেলুৱা বেগম, আমিৰ আলী আৰু দ্বীপেন বর্মন নামৰ সৰবৰাহকাৰীকেইজনক কৰায়ত্ত কৰিবলৈ সক্ষম হয়৷