নিয়মীয়া বার্তা, ১০ ফেব্ৰুৱাৰী:- আজি দিন দুপৰতে হোজাইৰ ফকিৰাবস্তিত সংঘটিত হয় এক চাঞ্চল্যকৰ ডকাইতি। ডকাইতে বিলাল উদ্দিন নামৰ এজন গাড়ী চালকৰ পৰা চোকা অস্ত্ৰৰে ডিঙি ৰেপি লুটি নিয়ে নগদ ধন। বিলাল উদ্দিন নামৰ চালকজনে আজি দিনৰ ভাগত নগাঁৱৰ পৰা AS 02 AC 6272 নম্বৰৰ সামগ্ৰী কঢ়িওৱা চাৰিচকীয়া বাহনেৰে আহি থকা অৱস্থাত হোজাইৰ ফকিৰাবস্তিত সংঘটিত হয় এই ঘটনা।
গুৰুতৰভাৱে আহত অৱস্থাত বাহনখনৰ বিলাল উদ্দিনক হোজাইৰ হাম চিকিৎসালয়ত ভৰ্ত্তি কৰোৱা হয় । এই ঘটনাৰ পিছত ঘটনাস্থলীত হোজাই আৰক্ষী উপস্থিত হৈ স্থানীয় ৰাইজৰ সহযোগত নগদ এক লাখ পোন্ধৰ হাজাৰ চাৰিশ টকাসহ আটক কৰে ডকাইতি সংঘটিত কৰা জিতেন দাস নামৰ এজনক। উল্লেখ্য যে জিতেন দাসৰ ঘৰ হোজাইৰ উত্তৰ বিদ্যানগৰত ঘৰ । তেওঁ এজন গাড়ী চালক । বিলাল উদ্দিনে পূৰ্বৰ চিনাকি সূত্ৰে নগাঁৱৰ পৰা ঘূৰি অহা পথত ধৃত জিতেন দাসক লগত উঠাই লৈ আহিছিল। ঘূৰি অহাৰ পথত ধৃত জিতেন দাসে গাড়ীৰ ভিতৰতে হত্যাৰ চেষ্টা চলাই সংঘটিত কৰে এই চাঞ্চল্যকৰ ডকাইতি । বৰ্তমান হোজাই আৰক্ষীৰ জিম্মাত ৰাখি ধৃত দাসক জেৰা চলাই আছে ।
প্ৰেৰক কিশলয় দেৱগোস্বামী