নিয়মীয়া বাৰ্তা ,১০ আগষ্ট : যোৰহাটৰ এক ব্যৱসায়িক অঞ্চল ঠাকুৰবাৰীত কালি নিশা এটি ভয়াবহ অগ্নিকাণ্ড স ঘটিত হয় । নিশা ১১-৫৫ মিনিটত হোৱা অগ্নিকাণ্ডটোত সিংঘী মটৰ্চ সম্পূৰ্ণ ভস্মীভূত হোৱাৰ লগতেই সমীপৰ ফাৰ্ণিচাৰ দোকানখনো জ্বলি উঠে।
অগ্নিনিৰ্বাপক বাহিনীৰ ১৩ খনকৈ বাহনৰ সহায়ত আৰু ভালেসংখ্যক অগ্নিযুজাৰু কৰ্মীৰ তৎপৰতাত নগৰলৈ জুই বিয়পি পৰাৰপৰা ৰক্ষা পৰে। উক্ত ঘটনাত আঘাতপ্ৰাপ্ত পাচজনকৈ ব্যক্তিক তৎকালীনভাবে যোৰহাট চিকিৎসা মহাবিদ্যালয়লৈ প্ৰেৰণ কৰে যদিও দুজনৰ মৃত্যু হয়। গোমতী দেৱী (৭২) আৰু সত্যনাৰায়ন আগৰৱাল(৭৫)ক চিকিৎসকে মৃত ঘোষণা কৰে ।পাছলৈ আন তিনজন মহেন্দ্ৰ আগৰৱাল (৫৮) কৃষ্ণ গোপাল আগৰৱাল(৫৫) আৰু উষা সিংঘী (৫০) ক গুৱাহাটী চিকিৎসা মহাবিদ্যালয়লৈ উন্নত চিকিৎসাৰ বাবে প্ৰেৰণ কৰে। অগ্নি নিয়ন্ত্ৰিত কৰিবলৈ জিলাখনৰ কেইবাটাও বিভাগে সহযোগিতা আগবঢ়ায়। ৰাজ্যিক দুৰ্যোগ প্ৰশমন বিভাগকে ধৰি বায়ু সেনা ,তেল আৰু প্ৰাকৃতিক গেছ আয়োগৰ কথা বিশেষভাবে উল্লেখনীয়।