যোৰহাটত বিশিষ্ট সাহিত্যিক অনুৰাধা শর্মা পূজাৰীৰে অন্তৰংগ আলাপ

নিয়মীয়া বাৰ্তা, ৫ এপ্ৰিলঃ “বঁটা নহয় , কর্মৰ দ্বাৰাহে প্রকৃত পৰিচয় গঢ়ি উঠে ৷ বঁটাই চিনাকিহে দিয়ে,  কর্মইহে ব্যক্তিৰ প্রকৃত মূল্যায়ন কৰে ।” উত্তৰ-পশ্চিম যোৰহাট কবি সন্মিলন আৰু প্রজ্ঞা সাৰথি , যোৰহাটৰ যৌথ উদ্যোগত ২৹২১ বর্ষৰ সাহিত্য অকাদেমি বঁটা প্রাপক প্রথিতযশা সাহিত্যিক তথা যোৰহাটৰ জীয়াৰী অনুৰাধা শর্মা পূজাৰীক সম্বর্ধনা জ্ঞাপন কৰিবৰ বাবে দুই এপ্রিলত যোৰহাটত  আয়োজন কৰা এক বিশেষ অনুষ্ঠানত সম্বর্ধনা গ্রহণ কৰি বিশিষ্ট সাহিত্যিকগৰাকীয়ে এইদৰে কয় ।

কবি সন্মিলনৰ সভাপতি দেবেন চন্দ্র বৰাৰ সঞ্চালনাত যোৰহাট প্রেছ ক্লাবত অনুষ্ঠিত অনুষ্ঠানত প্রথমেই যোৰহাট সাহিত্য সভাৰ সভাপতি ড৹ দিপালী খাৰঘৰীয়া কলিতাই এগছি বন্তি প্রজ্বলন কৰে । কণমানি ছাত্র অদিভিৎ বৰাৰ এটি প্রার্থনাৰে শুভাৰম্ভ হোৱা অনুষ্ঠানটি উদ্বোধন কৰে  বিশিষ্ট লেখক অনন্ত কুমাৰ শর্মাই । বিশিষ্ট লেখক বিকাশ বৰদলৈ, যোৰহাট সাহিত্য সভাৰ প্রাক্তন সভাপতি নীৰদা গগৈ বৰা, উত্তৰ পশ্চিম যোৰহাট কবি সন্মিলনৰ প্রাক্তন সভাপতি মানিক চন্দ্র বৰাই সন্মানীয় অতিথি হিচাপে অংশ লোৱা অনুষ্ঠানত উপস্থিত ৰাইজে সাহিত্যিকগৰাকীৰে অন্তৰংগ আলাপত মিলিত হয়। আলাপ অনুষ্ঠানত সাহিত্যিকগৰাকীয়ে বহু কথাৰে উপস্থিতসকলক মুগ্ধ কৰে ।

কবি সাংবাদিক অজন্ত কুমাৰ বৰাই আঁত ধৰা অনুষ্ঠানত যোৰহাট জিলা সাহিত্য সভা , জিলা কবি সন্মিলন, জিলা কোচ ৰাজবংশী ছাত্র সন্থা, জয়হিন্দ থিয়েটাৰ, কুশল নগৰ মহিলা সমিতি আদিয়ে অনুৰাধা শর্মা  পূজাৰীক সম্বর্ধনা জনায় ।  তদুপৰি অনুষ্ঠানৰ সৈতে সংগতি ৰাখি কমৰেড মোহন বৰা সোঁৱৰণত আয়োজিত কবি সন্মিলনত  দহগৰাকী নির্বাচিত কবিয়ে কবিতা পাঠো কৰে । কবি সন্মিলনখন বৰহোলা মহাবিদ্যালয়ৰ সহযোগী অধ্যাপক ড৹ দিপ্তী বৰুৱাই উদ্বোধন কৰে আৰু সাহিত্য সমালোচক ৰমানন্দন বৰাই পৰিচালনা কৰে । অনুষ্ঠানত  যোৰহাট সাহিত্য সভাৰ সম্পাদক অজন্ত কুমাৰ বৰা ‘জাতীয় চেতনা আৰু অন্যান্য ৰচনা’ শীর্ষক গ্রন্থখনো উন্মোচন কৰা হয় । উলেখ্য যে সাহিত্যিকগৰাকীক ঢোলে দগৰে সভাগৃহলৈ আদৰি অনা হয় ।

প্ৰেৰকঃনবজ্যোতি তামুলী, চিনামৰা