নিয়মীয়া বাৰ্তা, ১০ জুনঃ ক’ৰোনা ভাইৰাছ সংক্ৰমণৰ এই জটিল সময়ত ৰাইজৰ মাজত সজাগতা আনিবৰ বাবে নিজৰ জীৱন তুচ্ছ কৰি প্ৰশাসনৰ সৈতে প্ৰতিটো মুহূৰ্ততে সহযোদ্ধা হিচাপে বাতৰি পৰিবেশন কৰি সামাজিক দায়িত্ব পালন কৰা তিতাবৰ মহকুমাৰ গ্ৰাম্য সাংবাদিক সকলক মানসিক অনুপ্ৰেৰণা যোগোৱাৰ উদ্দেশ্যে আজি তিতাবৰ লীলাকান্ত বৰুৱা মেমৰিয়েল ভৱনত চেম্বাৰ্চ অৱ কমাৰ্চে ১৫ গৰাকী সাংবাদিকক সম্বধৰ্না জনায়।
এই উপলক্ষে বিয়লি তিতাবৰ মহকুমা গ্ৰাম্য সাংবাদিক সন্থাৰ সম্পাদক ইউছুফ আলীয়ে আঁত ধৰা অনুষ্ঠানটিত তিতাবৰ চেম্বাৰ্চ অৱ কমাৰ্চৰ উপদেষ্টা দিলীপ জালানে কয় যে — তিতাবৰ মহকুমাৰ সাংবাদিকসকলে ক’ৰোনা ভাইৰাছৰ ভয়ংকৰ সংক্ৰমণৰ সময়তো একোগৰাকী যোদ্ধা হিচাপে সমাজৰ প্ৰতি দায়িত্ব পালন কৰি অৰিহনা যোগাই আহিছে। সেয়ে আমি তিতাবৰ চেম্বাৰ্চ অৱ কমাৰ্চৰ ফালৰ পৰা আজি এনেদৰে তেওঁলোকক সম্বধৰ্না জ্ঞাপন কৰিবলৈ পাই গৌৰৱ অনুভৱ কৰিছোঁ। অনুষ্ঠানটিত চেম্বাৰ্চ অৱ কমাৰ্চে ক্ৰমে ‘নিয়মীয়া বাৰ্তা’ৰ সাংবাদিক ইউছুফ আলী আৰু অজয় শইকীয়া, ‘অসমীয়া প্ৰতিদিন’ৰ প্ৰণৱজ্যোতি কলিতা আৰু মণ্টুচ্ কোঁৱৰ, ‘প্ৰাগ নিউজ’ৰ চিত্তকমল বেজবৰা, ‘ডি ৱাই ৩৬৫’ৰ চক্ৰসেন গগৈ আৰু প্ৰকাশ বৰদলৈ, ‘আছাম টকচ্’ৰ সঞ্জীৱ দত্ত, নিউজ টাইম আছামৰ ছাজিদ হুছেইন, ‘ঈষান নিউজ’ৰ অমৰজিত সিং ৰাজপুত, ‘নিউজ ৱান আছাম’ৰ ধ্ৰুৱজ্যোতি শইকীয়াকে ধৰি তিতাবৰ মহকুমাৰ প্ৰায় ১৫ গৰাকী সাংবাদিকক একোখনকৈ ফুলাম গামোছা , এখন মাস্ক, ছেনিটাইজাৰ আৰু সম্বধৰ্না পত্ৰৰে সম্বধৰ্না জ্ঞাপন কৰে। উল্লেখ্য যে সভাত তিতাবৰ মহকুমাৰ চেম্বাৰ্চ অৱ কমাৰ্চৰ সভাপতি প্ৰদীপ কালোৱাৰ, উপসভাপতি টুটুল লহকৰ, সাধাৰণ সম্পাদক আকবৰ হুছেইন, সম্পাদক অনুপম ৰাজখোৱা আৰু নাৰায়ণ গাট্টানীকে কেইবাজনো ব্যক্তি উপস্থিত থাকে।