নিয়মীয়া বাৰ্তা, ৫ জানুৱাৰী: আজি দিনত তিনিচুকীয়াৰ সদাব্যস্ত গোপীনাথ বৰদলৈ পথত এক ভয়ানক পথ দুৰ্ঘটনা সংঘটিত হয়, তাকে লৈ এক উত্তপ্ত পৰিস্থিতিৰ সৃষ্টি হয় ৷ ঘটনা অনুসৰি এ এছ ০৬ জেদ ৬৪৭৬ নম্বৰৰ এখন বলেৰ’ বাহনে হঠাৎ পথৰ কাষৰ চাৰিগৰাকী লোকক খুন্দিয়াই কম-বেছি পৰিমাণে আঘাতপ্ৰাপ্ত কৰাৰ লগতে পদপথৰ বিপনী, ৰিক্সা, ঠেলাত খুন্দিয়াই ভাঙি লণ্ডভণ্ড কৰে ৷ স্থানীয় ৰাইজৰ তৎপৰতাত ততাতৈয়াকৈ আঘাতপ্ৰাপ্তসকলক চিকিৎসাৰ কাৰণে তিনিচুকীয়া অসামৰিক চিকিৎসালয়লৈ প্ৰেৰণ কৰাৰ সমান্তৰালভাৱে পৰৱৰ্তী সময়ত ঘটনাস্থলীত তিনিচুকীয়াৰ আৰক্ষী উপস্থিত হৈ বাহনখনৰ চালকজনক স্থানীয় ৰাইজৰ সহযোগত কৰায়ত্ব কৰাৰ লগতে বাহনখনত অহা এগৰাকী যুৱতীক স্থানীয় ৰাইজে খেদি খেদি কৰায়ত্ব কৰি আৰক্ষীক চমজাই দিয়ে ৷ আৰক্ষীয়ে দুৰ্ঘটনা সংঘটিত কৰা বাহনখন তিনিচুকীয়া সদৰ আৰক্ষী থানালৈ লৈ যোৱাৰ লগতে আটকাধীন দুই চালক-আৰোহীক অধিক তথ্যৰ সন্ধানত জেৰা অব্যাহত ৰাখে ৷ প্ৰত্যক্ষদৰ্শীৰ অভিযোগ অনুসৰি বাহনখনত যুৱক-যুৱতীহালে সুৰা সেৱন কৰি বাহন চলাই আহিছিল ৷ যদিহে প্ৰকতাৰ্থত যুৱক-যু্ৱতীহালে সুৰা সেৱন কৰি চহৰৰ মাজমজিয়াত বাহন চলাই দুৰ্ঘটনা সংঘটিত কৰিছে তেন্তে ৩১ ডিচেম্বৰৰ প্ৰাকক্ষণৰ পৰা জিলা প্ৰশাসন, জিলা পৰিবহণ বিভাগ, যানবাহন আৰক্ষীয়ে দুৰ্ঘটনা প্ৰতিৰোধৰ কাৰণে চলোৱা সুৰাপায়ী চালকৰ বিৰুদ্ধে অভিযানৰ পিছতো যে সুৰাপায়ী চালকৰ সংখ্যা হ্ৰাস পোৱা নাই সেয়া নিশ্চিত হৈছে ৷
প্ৰেৰক:- বিবেক বড়া