নিয়মীয়া বাৰ্তা, ৫ অক্টোবৰঃ ৰাজ্যৰ বিত্ত, স্বাস্থ্য আৰু শিক্ষা দপ্তৰৰ মন্ত্রী ড০ হিমন্ত বিশ্ব শর্মাৰ নাজিৰা ভ্রমণকালত মন্ত্রীজনক নিজৰ এখন আলোকচিত্র অংকন কৰি এজন চিত্র শিল্পীয়ে আকস্মিকভাৱে মন্ত্রীজনক সম্বর্ধনা জনোৱাত মন্ত্রী ড০ হিমন্ত বিশ্ব শর্মা আপ্লুত হৈ পৰে৷
উল্লেখ্য যে বিত্ত, স্বাস্থ্য আৰু শিক্ষামন্ত্রী ড০ হিমন্ত বিশ্ব শর্মাই শিৱসাগৰত ভাৰতীয় জনতা পার্টীৰ যুৱ মর্চাৰ এখন সভাত অংশগ্রহণ কৰাৰ লগতে নাজিৰা বিধানসভা সমষ্টিৰ পথৰ নির্মাণৰ শুভাৰম্ভ কৰাৰ উদ্দেশ্যে যোৱানিশা অ’ এন জি চিৰ নাজিৰা মুখ্য কার্যালয়স্থিত আৱর্ত ভৱনত উপস্থিত হয়৷ আজি পুৱা প্রায় ৯বজাত নাজিৰা চিত্রকলা কেন্দ্রৰ অধ্যক্ষ তথা বিশিষ্ট চিত্রশিল্পী আলি হাইদৰে মন্ত্রীজনৰ এখন আলোকচিত্র অংকন কৰি মন্ত্রীজনক সম্বর্ধনা জনোৱাৰ উদ্দেশ্যে আৱর্ত ভৱনত উপস্থিত হয়৷ সেই সময়ত বহু ব্যস্ততাৰ মাজতো মন্ত্রীয়ে চিত্রশিল্পীজনৰ এনে হাবিয়াসৰ কথা জানিব পাৰি ব্যক্তিগত সচিবৰ যোগেদি ইতিবাচক সঁহাৰি জনোৱাত চিত্রশিল্পী আলি হাইদৰ আৰু তেওঁৰ সহযোগী কৰিমউদ্দিন আহমেদে মন্ত্রীজনক নিজৰ কোঠাত লগ ধৰি মন্ত্রীজনৰ আলোকচিত্র অংকিত এখন ফটোৰে সম্বর্ধনা জনায়৷
মন্ত্রীজনে এই আলোকচিত্র গ্রহণ কৰি আপ্লুত হৈ পৰে৷ মন্ত্রী ড০ হিমন্ত বিশ্ব শর্মাই চিত্রশিল্পীজনৰ প্রতিভাৰ শলাগ লোৱাৰ লগতে তেওঁক আন্তৰিক শুভেচ্ছা জ্ঞাপন কৰে৷ ইয়াৰ কিছুসময় পাছতে মন্ত্রীজনে ফেচবুকযোগেও নাজিৰা চিত্রকলা কেন্দ্র আৰু চিত্রশিল্পী আলি হাইদৰৰ শলাগ লোৱাৰ লগতে আন্তৰিক শুভেচ্ছা জ্ঞাপন কৰে৷