নিয়মীয়া বাৰ্তা, ১০ মাৰ্চঃ সদ্যসমাপ্ত নগাঁও পৌৰসভা নিৰ্বাচনৰ কালি ফলাফল ঘোষণাৰ পিছতেই আজি ভাৰতীয় জনতা পাৰ্টিৰ নগাঁও জিলা সমিতিৰ উদ্যোগত বিজেপি আৰু অগপ দলৰ বিজয়ী নগাঁও পৌৰসভাৰ নৱনিৰ্বাচিত সদস্যসকলক সম্বৰ্ধনা জনোৱা হয়। নগাঁও চহৰৰ সাংস্কৃতিক প্ৰকল্পৰ প্ৰেক্ষাগৃহত অনুষ্ঠিত সম্বৰ্ধনা সভাখনত পৌৰসভা নিৰ্বাচনত বিজয়ী ভাৰতীয় জনতা পাৰ্টীৰ ২২ গৰাকী প্ৰাৰ্থী আৰু মিত্ৰজোঁটৰ অসম গণ পৰিষদ দলৰ ৩ গৰাকী প্ৰাৰ্থীক সম্বৰ্ধনা জনোৱা হয়।
উল্লেখ্য যে কালি ঘোষণা কৰা পৌৰসভা নিৰ্বাচনৰ ফলাফলত নগাঁও পৌৰসভাৰ ২৬ টা মহলাৰ ভিতৰতে অভিলেখ সৃষ্টি কৰি ২৫ খনকৈ আসন দখল কৰিবলৈ সক্ষম হৈছিল ভাৰতীয় জনতা পাৰ্টি আৰু মিত্ৰজোঁটৰ অসম গণ পৰিষদৰ প্ৰাৰ্থীসকলে। নবনিৰ্বাচিত পৌৰসভাৰ ২৫ গৰাকী সদস্যক আজি ভাৰতীয় জনতা পাৰ্টী নগাঁও জিলা সমিতিৰ উদ্যোগত সম্বৰ্ধনা জনোৱা হয়। সম্বৰ্ধনা সভাখনত নগাঁও সদৰ সমষ্টিৰ বিধায়ক ৰূপক শৰ্মা উপস্থিত থাকি পৌৰসভাৰ নৱনিৰ্বাচিত প্ৰতিগৰাকী সদস্যক সম্বৰ্ধনা জ্ঞাপন কৰি বিধায়ক শৰ্মাই কয় যে দেশৰ প্ৰধানমন্ত্ৰী নৰেন্দ্ৰ মোদী আৰু অসমৰ মুখ্যমন্ত্ৰী ড: হিমন্ত বিশ্ব শৰ্মাৰ প্ৰতি থকা ৰাইজৰ আস্থা আৰু বিশ্বাসৰ বাবেই আজি আমাৰ দলৰ প্ৰাৰ্থী সকলে সকলো নিৰ্বাচনতে সফলতা লাভ কৰিবলৈ সক্ষম হৈছে। যোৱা পাঁচটা বছৰত নগাঁৱত হোৱা উন্নয়নৰ ধাৰা অব্যাহত ৰখাৰ স্বাৰ্থতে নগাঁও চহৰবাসী ৰাইজে বিজেপিৰ মিত্রজোঁটৰ প্ৰাৰ্থীসকলক অন্তৰ খুলি জয়ী কৰাইছে। নগাঁও পৌৰসভাত অভূতপূৰ্ব বিজয় সাব্যস্ত কৰা ২৫ গৰাকী সদস্যক অভিনন্দন আৰু সম্বৰ্ধনা জ্ঞাপন কৰি আহ্লাদিত হৈ পৰিছো।লগতে পৌৰসভাৰ নৱনিৰ্বাচিত সদস্য সকলক আগন্তুক দিনত ৰাইজৰ হৈ নিষ্ঠাৰে কাম কৰি যাবলৈ বিধায়ক গৰাকীয়ে আহ্বান জনায় । পৌৰসভাৰ নৱনিৰ্বাচিত সদস্যসকলৰ নেতৃত্বত নগাঁও পৌৰসভাখন সমগ্ৰ ৰাজ্যৰ ভিতৰতে উজ্বলি উঠিব আৰু এখন স্বচ্ছ, নিকা,গতিশীল পৌৰসভা নগাঁও চহৰবাসীয়ে লাভ কৰিব বুলিও বিধায়ক শৰ্মাই মন্তব্য কৰে।
আনহাতে কংগ্ৰেছ দলক সমালোচনা কৰি বিধায়ক শৰ্মাই কয় যে মিছা কথাৰে মানুহৰ মাজত বিভেদ সৃষ্টি কৰি আহা কংগ্ৰেছ দলক ৰাইজে পুনৰ প্ৰত্যাখ্যান কৰিলে। আজি অনুষ্ঠিত হোৱা সম্বৰ্ধনা অনুষ্ঠানত ভাৰতীয় জনতা পাৰ্টিৰ নগাঁও জিলাৰ সভাপতি অভিজিৎ নাথ আৰু অসম গণ পৰিষদৰ নগাঁও জিলা সমিতিৰ সভাপতি মণি মাধৱ মহন্ত প্ৰমুখ্যে দলীয় কাৰ্যকতা সকল উপস্থিত থাকে। উল্লেখ্য যে কালি পৌৰসভা নিৰ্বাচনৰ ফলাফল ঘোষণাৰ পাচত আজি নগাঁৱত সৰ্বপ্ৰথম বিজেপি-অগপৰ মিত্রজোঁটৰ বিজয়ী প্ৰাৰ্থীসকলক এনেদৰে সম্বৰ্ধনা জনোৱা হয় ।