নিয়মীয়া বাৰ্তা, ৫ জানুৱাৰীঃ আগন্তুক ১৬ আৰু ১৭ জানুৱাৰীত টি এম পি কেৰ সোণালী জয়ন্তী বৰ্ষ উদযাপন কৰা জোনাইত। ইয়াৰ লগত সংগতি ৰাখি জোনাই-ৰাজাখা গোৰ্খা আঞ্চলিক ছাত্ৰ সন্থাৰ উদ্যোগত সোণালী জয়ন্তীস্থলীত চাফাই অভিযান কাৰ্যসূচী হাতত লয়। উল্লেখ্য যে জোনাই উচ্চতৰ মাধ্যমিক বিদ্যালয়ৰ খেলপথাৰত টাকাম মিচিং পৰিণ কৌবাঙৰ সোণালী জয়ন্তীৰ প্ৰস্তুতি চলাই থকা হৈছে৷
অসমৰ দ্বিতীয় বৃহৎ জনজাতি জনগোষ্ঠী মিচিংসকলৰ একমাত্ৰ ছাত্ৰ সংগঠন ১৯৭১ চনত জন্ম লাভ কৰা সদৌ মিচিং ছাত্ৰ সন্থা ( টিএমপিকে)ই সোণালী জয়ন্তী বৰ্ষত ভৰি দিছে।সংগঠনটোৰ গৌৰৱোজ্জ্বল সোণালী জয়ন্তী বৰ্ষৰ কাৰ্যসূচী বৰ্ণাঢ্য আৰু বিস্তৃত কাৰ্যসূচীৰে বছৰজোৰাকৈ উদযাপনৰ সিদ্ধান্ত গ্ৰহণ কৰিছে।
সেই অনুসৰি জোনাই, ঢকুৱাখনা, মাজুলী, চিলাপথাৰ আৰু গোগামুখত ৰূপায়ণ কৰিবলগীয়া এই কাৰ্যসূচী এই মাহৰ পৰা জোনাইত শুভাৰম্ভ হ’ব। টিএমপিকেৰ উক্ত সোণালী জয়ন্তী বৰ্ষ উদযাপনৰ কাৰ্যসূচী সফল কৰাত ভাতৃ সংগঠন গোৰ্খা ছাত্র সন্থাই সহযোগিতা কৰিব বুলি জানিব দিয়ে৷
আজিৰ কাৰ্যসূচীত মিচিং স্বায়ত্তশাসিত ডেবিং দেতাক সমষ্টিৰ সাধাৰণ সদস্য পদুম ৰায়, ধেমাজি জিলা গোৰ্খা উন্নয়ন পৰিষদৰ সদস্য পাৰ্থ ছেত্ৰী, গোৰ্খা ছাত্র সন্থা প্ৰাক্তন সদস্য লোক বাহাদুৰ ৰায়, সদৌ অসম গোৰ্খা ছাত্র সন্থাৰ ধেমাজি জিলাৰ বি চি চি চিফট দিলীপ কুমাৰ লিম্বু , দীননাথ উপাধ্যায়, হৰি কুমাৰ প্ৰধান, বিমল লোহাৰ, কুমাৰ লোহাৰ বমেৰ ৰাণা, দেৱেন্দ্ৰ গুৰুং আৰু জোনাই গোৰ্খা ছাত্র সন্থা জোনাই আঞ্চলিক সমিতিৰ সভাপতি-সম্পাদক, ৰাজাখানা আঞ্চলিক ছাত্র সন্থাৰ সভাপতি-সম্পাদক আৰু সদস্যসকল উপস্থিত হৈ চাফাই কাৰ্যসূচী ৰূপায়ণ কৰে৷