নিয়মীয়া বাৰ্তা ৩১ ডিচেম্বৰঃ শোণিতপুৰৰ ৰঙাপৰাত আজি সংঘটিত হয় শিক্ষক সমাজক লজ্জানত কৰা এক ঘটনা । জানিব পৰা মতে, বালিপৰা খণ্ড প্ৰাথমিক শিক্ষা বিষয়া তথা খণ্ড মিছন কাৰ্যালয়ৰ অধীনৰ ২ নং ৰৌনাথপুৰ প্ৰাথমিক বিদ্যালয়ৰ এজন টেট শিক্ষকে বিদ্যালয়খনৰ পঞ্চম শ্ৰেণীৰ এগৰাকী ছাত্ৰীক অসৎ কামনা চৰিতাৰ্থে কৰি আজি ৰঙাঘৰৰ আলহী হ’বলগীয়া হোৱাৰ ঘটনাই অঞ্চলজুৰি তীব্ৰ চাঞ্চল্যৰ সৃষ্টি কৰিছে ।
ঘটনাৰ বিৱৰণী অনুসৰি, বিদ্যালয়খনত কৰ্মৰত কিৰণ বৰা নামৰ টে’ট শিক্ষকজনে কালি বিদ্যালয়ত কোনো নথকাৰ সুযোগ গ্ৰহণ কৰি পঞ্চম শ্ৰেণীৰ এগৰাকী ছাত্ৰীৰ সৈতে অসৎ কামনা চৰিতাৰ্থ কৰি নিজা ঘৰলৈ পলাই যায় । আজি ঘটনাতো পৰিয়ালৰ কাণত পৰা পৰিয়ালৰ লোকে ঘটনা সন্দৰ্ভত ৰঙাপৰা আৰক্ষী থানাত এখন এজাহাৰ দাখিল কৰে । লম্পট টে’ট শিক্ষকজনে গোলাঘাটৰ নিজা ঘৰলৈ গুচি যোৱাত আজি ৰঙাপৰা থানাৰ এজাহাৰৰ ভিত্তিত গোলাঘাট আৰক্ষীয়ে আটক কৰিছে । ধৃত টে’ট শিক্ষকজনৰ ঘৰ গোলাঘাটৰ কমাৰবন্ধাত বুলি জানিব পৰা গৈছে ।