নিয়মীয়া বাৰ্তা, ১৬ এপ্ৰিল: ৰঙিয়া থানাত আজি আবেলি ৰঙালী বিহু উপলক্ষে এক কাৰ্যসূচীৰ আয়োজন কৰা হয় । থানা চৌহদত অনুষ্ঠিত বিহুৰ উক্ত কাৰ্যসূচীত প্ৰথমে প্ৰায় ৩০ ৰো অধিক জ্যেষ্ঠ নাগৰিকক সম্বৰ্ধনা জনোৱা হয় । লগতে উপস্থিত আৰক্ষী বিষয়া আৰু কনিষ্টবলে তামোল-পানৰ শৰাই আগবঢ়াই আশীৰ্বাদ লয় । থানাখনৰ ভাৰপ্ৰাপ্ত আৰক্ষী বিষয়া ভাস্কৰ মল্ল পাটোৱাৰীৰ বিশেষ উদ্যোগত অনুষ্ঠিত উক্ত অনুষ্ঠানত জ্যেষ্ঠ সাংবাদিক প্ৰকাশ ডেকাৰ সঞ্চালনাত অন্তৰংগ আলাপৰ আয়োজন কৰা হয় । উক্ত অনুষ্ঠানত ৰঙিয়া ৰাজহ চক্ৰ বিষয়া লীনা পাৱেয়ে বিহুৰ পৰম্পৰা আৰু ঐতিহ্যৰ ওপৰত বক্তব্য আগবঢ়ায় । অৱসৰপ্ৰাপ্ত অধ্যাপক তথা বিশিষ্ট শিক্ষাবিদ পবিন কলিতা , ৰঙিয়া আলোচনী সভাৰ সভাপতি অকন ডেকা , শিল্পী পেঞ্চনাৰ নৰেন্দ্ৰ শৰ্মা , ৰঙিয়া লেখিকা সমাৰোহৰ সভানেত্ৰী গৌৰিপ্ৰভা মহন্ত , অৱসৰপ্ৰাপ্ত অধ্যক্ষ প্ৰভাত চৌধুৰী , অৱসৰপ্ৰাপ্ত শিক্ষক পৰমেশ্বৰ বুজৰবৰুৱা আদিকে ধৰি বহু কেইগৰাকী লোকে বিহুৰ ওপৰত বক্তব্য ৰাখে । আনহাতে ৰঙিয়া আলোচনী সভাই ভাৰপ্ৰাপ্ত আৰক্ষী বিষয়া পাটোৱাৰীক এটি কিতাপৰ টোপোলা আগবঢ়ায় । ইফালে নাহৰ বিহু দলে বিহু নৃত্য প্ৰদৰ্শন কৰি সকলোকে আপ্লুত কৰে ।
ফাৰুক হুছেইন , ৰঙিয়া ।