শুৱালকুছিত ‘হিমন্ত বিশ্ব জিন্দাবাদ’ শীর্ষক এলবাম মুকলি

নিয়মীয়া বাৰ্তা ২৫ মাৰ্চঃ জালুকবাৰী সমষ্টিৰ শুৱালকুছিত আজি বিজেপিৰ প্রার্থী তথা মন্ত্রী ড০ হিমন্ত বিশ্ব শর্মাক অভিলেখসংখ্যক ভোটত জয়ী কৰাৰ বাবে এটা অডি’ এলবাম মুকলি কৰে৷ এই উপলক্ষে শুৱালকুছি কলিতাপাৰাত হিমন্ত বিশ্ব শর্মা সমর্থক গ্রুপৰ নির্বাচনী কার্যালয়ত এখন প্রচাৰ সভা অনুষ্ঠিত হয়৷ মধ্য শুৱালকুছি মণ্ডল বিজেপিৰ মুখ্য নির্বাচনী কার্যকর্তা যশপাল কলিতাৰ সভাপতিত্বত অনুষ্ঠিত সভাত ‘হিমন্ত বিশ্ব জিন্দাবাদ’ নামৰ অডি’ এলবামটো মুকলি কৰা হয়৷ এলবামটোৰ কথা আৰু সুৰ অলক নাথ, মনজিৎ বৰুৱা আৰু পল্লৱৰ৷ সংগীত সৌৰভ অলকৰ৷ কণ্ঠদান কৰিছে উদীয়মান শিল্পী অলক নাথে৷

ইতিমধ্যে উন্মোচনৰ পিছতে বিজেপিৰ প্রতিটো নির্বাচনী কার্যালয়তে বাজি উঠিছে গীতটো৷ গীতটোৱে ছ’চিয়েল মিডিয়াতো জনপ্রিয় হ’ব বুলি আশা কৰিছে হিমন্ত বিশ্ব শর্মা সমর্থক গ্রুপে৷ এলবাম উন্মোচন উপলক্ষে অনুষ্ঠিত সভাত পূব শুৱালকুছি গাঁও পঞ্চায়তৰ সভাপতি দিগন্ত দাসে কয়– ৰাজ্যৰ ষ্টাৰ কেম্পেইনাৰগৰাকী আমি প্রার্থী হিচাপে পোৱাটো সৌভাগ্যৰ কথা৷ ৰাজ্যত পুনৰ বিজেপিৰ নেতৃত্বত চৰকাৰ হোৱাটো এশ শতাংশ সত্য৷ সেয়ে আমাৰ প্রার্থী ড০ হিমন্ত বিশ্ব শর্মাক অভিলেখসংখ্যক ভোটেৰে জয়যুক্ত কৰাটো আমাৰ পণ৷ অসমৰ উন্নয়নৰ প্রতীক ড০ হিমন্ত বিশ্ব শর্মাক পদুমৰ ছবিত ভোট দি জয়যুক্ত কৰাৰ বাবে তেওঁ আহ্বান জনায়৷ সমর্থক গ্রুপৰ সভাপতি তাপস দাসে আঁত ধৰা সভাত মধ্য শুৱালকুছি পঞ্চায়তৰ সভাপতি মানৱ কলিতা, আঞ্চলিক সদস্য গৌতম বৈশ্য, জ্যেষ্ঠ বিজেপি কর্মী পৰেশ কলিতা, সমর্থক গ্রুপৰ সম্পাদক মিতোপম কাকতি প্রমুখ্যে কেইবাজনো কার্যকর্তা উপস্থিত থাকে৷