নিয়মীয়া বাৰ্তা, ৫ ছেপ্টেম্বৰঃ মাৰ্ঘেৰিটা মহকুমা প্ৰাথমিক শিক্ষক সন্মিলনীৰ উদ্যোগত আজি ৫৯তম শিক্ষক দিৱস মাৰ্ঘেৰিটা খণ্ড উন্নয়ন বিষয়াৰ কাৰ্যালয়ৰ প্ৰেক্ষাগৃহত অনুষ্ঠিত হৈ যায়। মহকুমা প্ৰাথমিক শিক্ষক সন্মিলনৰ সম্পাদক উৎপল কোঁৱৰে আঁত ধৰা সভাৰ আৰম্ভণিতে বন্তি প্ৰজ্বলন কৰে প্ৰাক্তন সভাপতি লক্ষ্মীনাথ হালৱাই। সভাই মাৰ্ঘেৰিটাৰ বিশিষ্ট সমাজকৰ্মী, কবি তথা ২০২০ বৰ্ষৰ সাংবাদিক পেন্সনাৰ গকুল কৃষ্ণ শৰ্মাৰ বিয়োগত গভীৰ শোক প্ৰকাশ কৰি এক মিনিট সময় মৌন প্ৰাৰ্থনা জনোৱা হয়।
আজিৰ সভাৰ মাজতে ছাত্ৰ নেতা ৰাজীৱ বৰুৱাই মাস্ক বিতৰণ কৰে। মাৰ্ঘেৰিটা মহকুমা প্ৰাথমিক শিক্ষক সন্মিলনীৰ তৰফৰ পৰা ১৩জন মহকুমা শিক্ষক সন্মিলনীৰ প্ৰাক্তন বিষয়ববীয়া লক্ষ্মীনাথ হালৱা, মহেন্দ্ৰ মৰাণ, পিনাকী শইকীয়া, কুলধৰ গগৈ, জগত সোণোৱাল, শৰৎ নাথ, ডিম্বেশ্বৰ গগৈ, দৌলত শইকীয়া, মুনিন বৰুৱাৰ লগতে কৰ্মৰত বাসন্তী বৰুৱা, অজিত কোঁৱৰ আৰু জয়ন্ত শৰ্মাক সম্বৰ্দ্ধনা জনোৱা হয়। আজিৰ সভাত সংবাদ কৰ্মী সমীৰণ বৰঠাকুৰক সম্বৰ্দ্ধনা জনোৱা হয়।