কোৱাৰেণ্টাইন কেন্দ্রৰ পৰা পলায়ন কৰা যুৱকক প্রেমিকাসহ আটক

নিয়মীয়া বাৰ্তা, ২২ জুনঃ বঙাইগাঁও জিলাৰ মেৰেৰচৰ থানাৰ অন্তর্গত শিমলীতলা পার্ট ২ এল পি স্কুল কোৱাৰেণ্টাইন চেণ্টাৰৰ পৰা এজন যুৱকৰ পলায়নৰ ঘটনাই অঞ্চলটোত চাঞ্চল্যৰ সৃষ্টি কৰিছে৷

মেৰেৰচৰ থানাৰ অন্তর্গত শিমলীতলা পার্ট ২ এল পি স্কুল কোৱাৰেণ্টাইন কেন্দ্রত শিমলীতলাৰ খুৰছিদ আলমে বিগত ৪ দিন ধৰি কোৱাৰেণ্টাইন হৈ আছিল৷ খুৰছিদ আলমে শনিবাৰে নিশা কৌশলেৰে কোৱাৰেণ্টাইন চেণ্টাৰৰ পৰা পলায়ন কৰে৷ ইয়াৰ পিছতেই আৰক্ষীয়ে পলাতক যুৱকজনক বিচাৰি অভিযান চলায়৷

ইপিনে খুৰছিদ আলমে অভয়াপুৰীৰ পাৰেৰচৰৰ নার্গিছ আখতাৰ নামৰ যুৱতী এগৰাকীক ঘৰৰ পৰা পলুৱাই নি থকা অৱস্থাতে লেংটিছিঙা আৰক্ষীৰ টহলদাৰী দল এটাই আটক কৰিবলৈ সক্ষম হয়৷

দেওবাৰে আৰক্ষীয়ে খুৰছিদ আলমক পুনৰ কোৱাৰেণ্টাইন চেণ্টাৰত পঠিয়াই দিয়াৰ লগতে যুৱতীগৰাকীক পৰিয়ালৰ হাতত গতাই দিয়ে৷ খুৰছিদ আলম মুম্বাইৰ পৰা আহি কোৱাৰেণ্টাইন হৈ আছিল৷