নিয়মীয়া বাৰ্তা, ২৪ মার্চঃ বিশ্বৰ সর্বত্র আতংকময় পৰিস্থিতিৰ সৃষ্টি কৰা মাৰাত্মক ক’ভিড–১৯ত আক্রান্ত হৈছে অলিম্পিকত স্বর্ণ বিজয়ী দক্ষিণ আফ্রিকাৰ তাৰকা সাঁতোৰবিদ কেমেৰুন ভান ডাৰ বার্গ ৷ যোৱা ১৪ দিন ধৰি এই ভাইৰাছৰ সৈতে তেওঁ যুঁজ দি আছে বুলি ৩১ বছৰীয়া সাঁতোৰবিদগৰাকীয়ে সোমবাৰে টুইটাৰত প্রকাশ কৰিছে ৷ ক’ভিড–১৯ক বিশ্বৰ অন্যতম ভয়াৱহ ভাইৰাছ হিচাপে আখ্যা দি কেমেৰুনে কৈছে যে যোৱা কেইদিনত তেওঁ উশাহ–নিশাহত যথেষ্ট কষ্ট অনুভৱ কৰিছে ৷ ভাইৰাছত আক্রান্ত হোৱাৰ বাবে সম্প্রতি তেওঁ টকিঅ’ অলিম্পিকলৈ প্রস্তুতি চলাব পৰা নাই বুলিও সাঁতোৰবিদগৰাকীয়ে জানিবলৈ দিয়ে ৷ মন কৰিবলগীয়া যে ২০১২ৰ গ্রীষ্মকালীন অলিম্পিকত কেমেৰুন ভান ডাৰ বার্গে ১০০ মিটাৰ ব্রেষ্ট ষ্ট্রোকত সোণৰ পদক অর্জন কৰিবলৈ সক্ষম হৈছিল ৷