নিয়মীয়া বাৰ্তা, ১৩ নৱেম্বৰঃ টি–২০ বিশ্বকাপত অষ্ট্রেলিয়াৰ বিৰুদ্ধে বৃহস্পতিবাৰে নিশা ছেমিফাইনেল খেলাৰ পূর্বে দুনিশা আই চি ইউত আছিল পাকিস্তানৰ তাৰকা অ’পেনাৰ মহম্মদ ৰিজৱান৷ বুকুত গুৰুতৰ সংক্রমণৰ সন্মুখীন হোৱাত তেওঁক দলীয় চিকিৎসকে ৯ নৱেম্বৰত ডুবাইৰ এখন হাস্পতালত ভর্তি কৰাইছিল৷ অষ্ট্রেলিয়াৰ হাতত পৰাস্ত হৈ টি–২০ বিশ্বকাপত অভিযান সামৰাৰ পিছত এই কথা প্রকাশ কৰিছে পাকিস্তানৰ দলীয় চিকিৎসক নাজিব ছোমৰো আৰু অধিনায়ক বাবৰ আজমে৷
‘৯ নৱেম্বৰত মহম্মদ ৰিজৱানৰ বুকুত গুৰুতৰ সংক্রমণ দেখিবলৈ পোৱাত তেওঁক আমি চিকিৎসালয়ত ভর্তি কৰাওঁ৷ চিকিৎসালয়ৰ আই চি ইউত ২ নিশা কটোৱাৰ পিছত তেওঁ সুস্থ হৈ উঠে৷ ৰিজৱান মানসিকভাৱে যথেষ্ট শক্তিশালী আৰু তেওঁ যিকোনো প্রকাৰে ছেমিফাইনেল খেলিব বিচাৰিছিল৷ তেওঁৰ মনোবল দেখি আমি অভিভূত হৈছিলোঁ৷’ দলীয় চিকিৎসক ছোমৰোই এইদৰে কয়৷
ইফালে, ৰিজৱানৰ দৃঢ়তা আৰু খেলুৱৈসুলভ মানসিকতাক ভূয়সী প্রশংসা কৰিছে অধিনায়ক বাবৰ আজমে৷ উল্লেখ্য যে চলিত টি–২০ বিশ্বকাপত সুন্দৰ ফর্মত থকা অ’পেনাৰগৰাকীয়ে অসুস্থতা সত্ত্বেও দেশৰ হৈ খেলপথাৰত নামি ছেমিফাইনেলত ৫২ বলৰ সন্মুখীন হৈ ৬৭ ৰানৰ আকর্ষণীয় ইনিংছ খেলে৷