নিয়মীয়া বার্তা, ১৩ জুলাইঃ টকিঅ’ অলিম্পিকলৈ এতিয়ালৈকে যোগ্যতা অর্জন কৰা নাই ভাৰত তথা অসমৰ তাৰকা দৌৰবিদ হিমা দাসে৷ অৱশ্যে ইয়াক লৈ চিন্তিত হৈ পৰা নাই ধিং এক্সপ্রেছখ্যাত হিমা দাসে৷ সংবাদ প্রতিষ্ঠানৰে হোৱা এক বার্তালাপত সম্প্রতি এনআইএছ পাটিয়ালাত থকা হিমা দাসে কয় যে মহামাৰী ক’ৰোনা ভাইৰাছৰ ভয়াৱহতাৰ বাবে সম্প্রতি আন্তর্জাতিক খেলসমূহ সম্পূর্ণৰূপে বন্ধ হৈ আছে৷
যেতিয়া আন্তর্জাতিক প্রতিযোগিতাসমূহ আৰম্ভ হ’ব আৰু প্রতিযোগিতাসমূহত অংশগ্রহণ কৰি তেওঁ অলিম্পিকলৈ যোগ্যতা অর্জন কৰিব পাৰিব বুলি মন্তব্য কৰিছে৷ অলিম্পিকৰ কোৱালিফায়াৰক লৈ চিন্তিত নহয় বুলি মন্তব্য কৰি হিমা দাসে কয় যে এই চিন্তাই তেওঁৰ ওপৰত অধিক চাপৰহে সৃষ্টি কৰিব৷ অলিম্পিকলৈ এতিয়াও এবছৰ বাকী আছে৷ গতিকে, এতিয়াই ইয়াক লৈ মূৰ ঘমোৱা উচিত নহয়৷ সম্প্রতি হিমাই এনআইএছ পাটিয়ালাত চাইক্লিং আৰু ক্রিকেট খেলত ব্যস্ত হৈ আছে৷