নিয়মীয়া বাৰ্তা, ১৫ ডিচেম্বৰঃ বগা বলৰ ক্রিকেট কেৰিয়াৰক অধিক দীঘলীয়া কৰাৰ লক্ষ্যৰে টেষ্ট ক্রিকেটক বিদায় জনাব পাৰে টীম ইণ্ডিয়াৰ তাৰকা অলৰাউণ্ডাৰ ৰবীন্দ্র জাদেজাই৷ আঘাতৰ বাবে নিউজিলেণ্ডৰ বিৰুদ্ধে দ্বিতীয় টেষ্টত খেলিব নোৱাৰা অলৰাউণ্ডাৰগৰাকীয়ে এদিনীয়া আৰু টি–২০ ক্রিকেটত সম্পূর্ণৰূপে মনোনিৱেশ কৰিবলৈ টেষ্টৰ পৰা অৱসৰ লোৱাৰ চিন্তা–চর্চা কৰিছে বুলি ৰাষ্ট্রীয় সংবাদ মাধ্যমত বাতৰি প্রকাশ পাইছে৷
উল্লেখ্য যে ভাৰতৰ হৈ ৫৭খন টেষ্টত ২,১৯৫ ৰান সংগ্রহ কৰাৰ লগতে ২৩২টা উইকেট দখল কৰিবলৈ সক্ষম হোৱা জাদেজাই শেহতীয়াকৈ দক্ষিণ আফ্রিকা ভ্রমণৰ বাবে ঘোষিত টেষ্ট দলতো আঘাতৰ বাবে স্থান পোৱা নাই৷ উল্লেখ্য যে ভাৰতে অহা ২৬ ডিচেম্বৰৰ পৰা দক্ষিণ আফ্রিকাৰ বিৰুদ্ধে প্রথম টেষ্টত অৱতীর্ণ হ’ব৷