নিয়মীয়া বাৰ্তা, ২০ ফেব্ৰুৱাৰীঃ ঘৰুৱা দল নিউজিলেণ্ড আৰু টীম ইণ্ডিয়াৰ মাজৰ দুখনীয়া টেষ্ট শৃংখলাটোৰ প্রথমখন টেষ্ট ২১ ফেব্রুৱাৰীৰ পৰা ৱেলিংটনৰ বেছিন ৰিজার্ভত অনুষ্ঠিত হ’ব৷ শুকুৰবাৰৰ পৰা আৰম্ভ হ’বলগীয়া প্রথমখন টেষ্টত কিৱি বাহিনীৰ প্রত্যাহ্বান গ্রহণ কৰাৰ বাবে সম্পূর্ণৰূপে ভাৰতীয় দলটো সাজু আছে বুলি মন্তব্য কৰিছে অধিনায়ক বিৰাট কোহলিয়ে৷
বুধবাৰে আয়োজিত এক সংবাদ মেলত ভাগ লৈ অধিনায়ক কোহলিয়ে কয় যে ভাৰতীয় দলটোৱে প্রথমখন টেষ্টত শ্রেষ্ঠত্ব উজাৰি খেলিবলৈ সম্পূর্ণৰূপে সাজু আছে৷ এই টেষ্টখনৰ বাবে খেলুৱৈসকলে খেলপথাৰত অধিক মনোনিৱেশ কৰাৰ চেষ্টা চলাইছে৷ আশা কৰিছোঁ সতীর্থসকলে টেষ্টখনত নিজৰ শ্রেষ্ঠ প্রদর্শন দাঙি ধৰিব পাৰিব৷ এদিনীয়া শৃংখলাটোত দাঙি ধৰা প্রদর্শনে টেষ্ট শৃংখলাটোত বিশেষ প্রভাৱ নেপেলায় বুলি কোহলিয়ে লগতে উল্লেখ কৰে৷