নিয়মীয়া বাৰ্তা, ২১ মাৰ্চঃ পুৰুষৰ টি–২০ত অধিনায়ক হিচাপে সর্বাধিক মেচত জয়েৰে মহেন্দ্র সিং ধোনীৰ অভিলেখ স্পর্শ কৰিছে আফগানিস্তানৰ অধিনায়ক আছগৰ আফগানে৷ জিম্বাব’ৱেৰ বিৰুদ্ধে আবু ধাবিত যোৱানিশা অনুষ্ঠিত দ্বিতীয় টি–২০ত আফগানিস্তানে ৪৫ ৰানত জয় সাব্যস্ত কৰাৰ লগে লগে অধিনায়ক আছগৰে ভাৰতৰ প্রাক্তন অধিনায়ক ধোনীৰ অভিলেখ স্পর্শ কৰে৷
উল্লেখ্য যে একালৰ কিংবদন্তি উইকেটৰক্ষক ধোনীয়ে অধিনায়ক হিচাপে ভাৰতক ৪১খন টি–২০ মেচত জয়ৰ সোৱাদ দিবলৈ সক্ষম হৈছিল৷ সামগ্রিকভাৱে ৭২খন টি–২০ত দেশক নেতৃত্ব দিছিল৷ আফগানিস্তানৰ অধিনায়ক আছগৰেও যোৱানিশা অধিনায়ক হিচাপে টি–২০ত ৪১সংখ্যক জয়ৰ সোৱাদ লাভ কৰে৷ ইফালে, এই তালিকাৰ তৃতীয় স্থানত আছে ইংলেণ্ডৰ অধিনায়ক ইয়ন মৰগান৷