নিয়মীয়া বার্তা, ২৯ জানুৱাৰীঃ নর্থ ইষ্টার্ন ৱাৰিয়র্ছ দলে চলিত পঞ্চম প্রিমিয়াৰ বেডমিণ্টন লীগত আজি প্রাক্তন চেম্পিয়ন হায়দৰাবাদ হাণ্টার্ছৰে মুখামুখি হ’ব৷
উল্লেখ্য যে নর্থ–ইষ্টার্ন দলে পইণ্ট তালিকাৰ চতুর্থ স্থানত থকাৰ বিপৰীতে পি ভি সিন্ধুই নেতৃত্ব দিয়া হায়দৰাবাদে অন্তিম স্থানত আছে৷ নর্থ–ইষ্টার্নে চলিত ছিজনত জয়েৰে অভিযান আৰম্ভ কৰিছিল যদিও দ্বিতীয় মেচত পৰাজয়ৰ সন্মুখীন হয়৷ অৱশ্যে আজিৰ মেচখনক লৈ আত্মবিশ্বাসী উত্তৰ–পূবৰ দলটো৷
ইফালে, পুনে ছেভেন এচেছ দলে প্রতিযোগিতাখনত ক্রমাগত দ্বিতীয়টো বিজয় সাব্যস্ত কৰিছে৷ লক্ষ্ণৌত খেলা মেচখনত দলটোৱে ৪–৩ৰ ব্যৱধানত পৰাস্ত কৰে বাংগালুৰু ৰেপ্ঢর্ছক৷
উল্লেখ্য যে ডিফেণ্ডিং চেম্পিয়ন বাংগালুৰু দলে ছিজনৰ তৃতীয়খন মেচতো জয়ৰ মুখ নেদেখিলে৷