নিয়মীয়া বাৰ্তা, ২২ মে’: ভাৰতৰ বিস্ময় বালকৰূপে পৰিচিত ই চাৰি মাহৰ ভিতৰতে দ্বিতীয়বাৰ পৰাজিত কৰিছে বিশ্ব দবাৰ ১নং স্থানৰ খেলুৱৈ মেগনাছ চার্লছেনক৷ অনলাইন ৰেপিড দবা প্রতিযোগিতাৰ চেজেবল মাষ্টার্ছৰ পঞ্চম ৰাউণ্ডত চার্লছেনক পৰাজিত কৰে প্রজ্ঞানন্দই৷ ইয়াৰ লগতে প্রতিযোগিতাখনৰ নক আউটত প্রৱেশৰ আশাও সজীৱ কৰিলে তেওঁ৷ তীব্র প্রতিদ্বন্দ্বিতাপূর্ণ মেচখন ড্রৰ ফালে আগবাঢ়িছিল যদিও এটা ভুলৰ সুযোগ লৈ ১৬ বছৰীয়া কিশোৰগৰাকীয়ে মেচখন নিজৰ হাতলৈ নিয়ে৷ মেচখনৰ ৪০সংখ্যক চালত চার্লছেনে এটা ডাঙৰ ভুল কৰে৷ সেই ভুলৰ সুযোগ কামত লগাই তেওঁক পৰাভূত কৰে প্রজ্ঞানন্দই৷ এই মুহূর্তত প্রজ্ঞানন্দৰ সংগ্রহ ১২ পইণ্ট৷ আনহাতে পৰাজিত হ’লেও দ্বিতীয় স্থানত আছে চার্লছেন৷ তেওঁৰ নকআউটত প্রৱেশ কৰাৰ আশাও সজীৱ হৈ আছে৷ উল্লেখ্য যে যোৱা ফেব্রুৱাৰীত এয়াৰথিংছ মাষ্টার্ছত প্রথমবাৰ চার্লছেনক হৰুৱাইছিল প্রজ্ঞানন্দই৷ মাত্র ১৯নং মেচতে বিশ্বৰ ১নং দবাৰুগৰাকীক পৰাজিত কৰিছিল ভাৰতীয় কিশোৰগৰাকীয়ে৷