নিয়মীয়া বাৰ্তা, ১৯ এপ্ৰিলঃ প্রাক্তন ভাৰতীয় স্পিনাৰ ৰমেশ পাৱাৰে ভাৰতীয় মহিলা ক্রিকেট দলৰ মুখ্য প্রশিক্ষকৰ দায়িত্ব অক্ষুণ্ণ ৰাখিব৷ চুক্তি অনুসৰি এতিয়াও তেওঁৰ কার্যকাল শেষ হ’বলৈ এবছৰ বাকী আছে৷ উল্লেখ্য যে যোৱা বছৰৰ মে’ত প্রাক্তন ভাৰতীয় অ’পেনাৰ ডব্লিউ ভি ৰমণৰ স্থানত পাৱাৰক দুবছৰৰ বাবে মহিলা ক্রিকেট দলৰ প্রশিক্ষকৰ দায়িত্ব অর্পণ কৰা হৈছিল৷ কিন্তু নিউজিলেণ্ডত অলপতে সামৰণি পৰা মহিলা এদিনীয়া বিশ্বকাপত ভাৰতৰ হতাশজনক প্রদর্শনৰ পিছত ভাৰতীয় ক্রিকেট ব’র্ডে প্রশিক্ষকগৰাকীৰ দায়িত্ব সম্পর্কীয় বিষয়টো পর্যবেক্ষণ কৰিছে৷
ব’ৰ্ডৰ সূত্রই জানিবলৈ দিছে যে বিশ্বকাপত দক্ষিণ আফ্রিকাৰ হাতত পৰাজিত হৈ আগতীয়াকৈ ভাৰতে বিদায় লোৱা সন্দর্ভত ব’র্ডে আলোচনা কৰিছে যদিও হৰা–জিকা খেলৰ অংগ বুলি তেওঁলোকে ধৰি লৈছে৷ উল্লেখ্য যে ভাৰতে প্রতিযোগিতাখনৰ ছেমিফাইনেলত প্রৱেশ কৰিবলৈও সক্ষম নহ’ল৷ বিশ্বকাপৰ ৭খন মেচত দলটোৱে মাত্র তিনিখনতহে জয়লাভ কৰিবলৈ সক্ষম হৈছিল৷ মিতালী ৰাজৰ নেতৃত্বাধীন ভাৰতে ৮টা দলে অংশগ্রহণ কৰা প্রতিযোগিতাখনত পঞ্চম স্থানহে লাভ কৰে৷ ইয়াৰ পিছতে পাৱাৰক দায়িত্বৰ পৰা আঁতৰাব বুলি সংবাদ মাধ্যমত বাতৰি প্রকাশ পাইছিল৷