নিয়মীয়া বাৰ্তা,২০ মে’: আইবা মহিলা বিশ্ব বক্সিং চেম্পিয়নশ্বিপত স্বর্ণপদক জয় কৰি পঞ্চমগৰাকী ভাৰতীয় মহিলা বক্সাৰৰূপে গৌৰৱ অর্জন কৰিলে নিখাট জাৰিনে৷ ইস্তানবুলত অনুষ্ঠিত প্রতিযোগিতাখনৰ কালি মহিলাৰ ৫২ কেজিৰ ফাইনেলত শ্রেষ্ঠত্ব প্রতিপন্ন কৰি নিখাট জাৰিনে স্বর্ণপদক জয় কৰিবলৈ সক্ষম হয়৷ ফাইনেল মেচখনত ভাৰতীয় বক্সাৰগৰাকীয়ে থাইলেণ্ডৰ জুটামাছ জিটপঙক পৰাস্ত কৰি চেম্পিয়নৰ সন্মান অর্জন কৰে৷ স্বর্ণপদক যুঁজৰ মেচখনত তেলেংগানাৰ তাৰকা বক্সাৰগৰাকীয়ে টকিঅ’ অলিম্পিকৰ কোৱার্টাৰ ফাইনেলিষ্ট জিটপঙক শোচনীয়ভাৱে ৫–০ ব্যৱধানত পৰাস্ত কৰে৷ নিখাট জাৰিনৰ পূর্বে মহিলা বিশ্ব বক্সিং চেম্পিয়নশ্বিপত স্বর্ণপদক জয় কৰা ভাৰতীয় মহিলা বক্সাৰকেইগৰাকী হ’ল– এম চি মেৰীকম (৬বাৰ), সৰিতা দেৱী, জেনি আৰ এল আৰু লেখা কে চি৷ ইপিনে প্রতিযোগিতাখনত ভাৰতীয় দলটোৱে এটা স্বর্ণ আৰু দুটা ব্রঞ্জৰ পদক দখল কৰিবলৈ সক্ষম হয়৷ ৫৭ কেজিত মনীষা মৌন আৰু ৬৩ কেজিত পাৰবিন হুদাই ব্রঞ্জৰ পদক জয় কৰে৷