নিয়মীয়া বাৰ্তা, ১ এপ্ৰিলঃ চলিত আই পি এলৰ প্রথমখন মেচতে পৰাজয়ৰ সন্মুখীন হোৱা মুম্বাই ইণ্ডিয়ানছৰ বাবে সুখবৰ৷ আঘাতৰ পৰা সম্পূর্ণৰূপে আৰোগ্য লাভ কৰি পাঁচবাৰৰ চেম্পিয়ন মুম্বাই ইণ্ডিয়ানছত যোগ দিলে তাৰকা বেটছমেন সূর্য কুমাৰ যাদৱে৷ মুম্বাই ইণ্ডিয়ানছৰ এক বিবৃতিত আজি এই কথা সদৰী৷ অহা ২ এপ্রিলত ৰাজস্থান ৰয়েলছৰ বিৰুদ্ধে খেলিবলগীয়া মেচখনত মুম্বাই ইণ্ডিয়ানছৰ হৈ সূর্য কুমাৰ যাদৱে খেলাটো প্রায় নিশ্চিত৷ সূর্য কুমাৰ যাদৱে কোৱাৰেইণ্টাইন সম্পূর্ণ কৰি দলত যোগদান কৰিছে আৰু বেটছমেনগৰাকীয়ে সতীর্থ কিৰণ প’লার্ড, ঈশান কিশন আৰু যশপ্রীত বুমৰাহৰ সৈতে জিমত অনুশীলন আৰম্ভ কৰিছে বুলি মুম্বাই ইণ্ডিয়ানছৰ বিবৃতিটোত সদৰী৷ সূর্য কুমাৰ যাদৱৰ প্রত্যাৱর্তনে পাঁচবাৰৰ চেম্পিয়ন মুম্বাই ইণ্ডিয়ানছৰ মনোবল বহুখিনি বৃদ্ধি কৰি তুলিছে৷