নিয়মীয়া বাৰ্তা, ২৫ আগষ্টঃ ভাৰতীয় ক্রীড়াপ্রেমীৰ বাবে সুখবৰ৷ অলিম্পিক চেম্পিয়ন তাৰকা জেভলিন থ্র’ৱাৰ নীৰজ চোপ্রাই ছুইজাৰলেণ্ডৰ লুছানেত হ’বলগীয়া ডায়মণ্ড লীগত অংশগ্রহণ কৰিব৷ ২৬ আগষ্টত হ’বলগীয়া লুছানে ডায়মণ্ড লীগত উন্নত প্রদর্শন দাঙি ধৰি নীৰজ চোপ্রাই ৭–৮ ছেপ্ঢেম্বৰ জুৰিখত হ’বলগীয়া ডায়মণ্ড লীগ ফাইনেললৈ যোগ্যতা অর্জন কৰাৰ লক্ষ্য লৈছে৷
মন কৰিবলগীয়া যে ২৪জুলাইত আমেৰিকাৰ ইউজিনিত অনুষ্ঠিত বিশ্ব চেম্পিয়নশ্বিপৰ ফাইনেলৰ সময়ছোৱাত গোৰোহাত আঘাত পাইছিল আৰু ইয়াৰ ফলত তাৰকা জেভলিন থ্র’ৱাৰগৰাকীয়ে ২৮ জুলাইৰ পৰা ৮ আগষ্টলৈ বার্মিংহামত অনুষ্ঠিত কমনৱেলথ গেমছত অংশ লোৱাৰ পৰা বিৰত আছিল৷ নিজৰ আঘাত সন্দর্ভত তাৰকাগৰাকীয়ে কয় যে বর্তমান তেওঁ আঘাতৰ পৰা সম্পূর্ণ ৰূপে সুস্থ হৈ উঠিছে আৰু অহা শুকুৰবাৰে লুছানে ডায়মণ্ড লীগত ভাগ লোৱাৰ বাবে উদগ্রীৱ হৈ আছে৷
উল্লেখ্য যে যোৱা ১৭ আগষ্টত আয়োজকে প্রতিযোগিতাখনৰ জেভলিন থ্র’ত অংশ ল’বলগীয়া খেলুৱৈসকলৰ তালিকাখন প্রকাশ কৰিছিল যদিও নীৰজ চোপ্রাৰ অংশগ্রহণ সন্দর্ভত উৎসুকতাৰ সৃষ্টি হৈছিল৷