নিয়মীয়া বাৰ্তা ৬ মাৰ্চঃ আইচিচি মহিলা টি–২০ বিশ্বকাপৰ ফাইনেলত প্রৱেশ কৰি ইতিহাস ৰচা ভাৰতীয় মহিলা দলটোক প্রশংসাৰে উপচাই পেলাইছে টীম ইণ্ডিয়াৰ অধিনায়ক বিৰাট কোহলি, প্রাক্তন তাৰকা ভি ভি এছ লক্ষ্মণ, বীৰেন্দ্র সেহৱাগ আৰু প্রাক্তন মহিলা ক্রিকেটাৰ মিতালী ৰাজে৷ হৰমনপ্রীত কৌৰ বাহিনীৰ প্রদর্শনে গৌৰৱান্বিত কৰা বুলি উল্লেখ কৰি কোহলিয়ে দলটোক ফাইনেলৰ বাবে শুভেচ্ছা জ্ঞাপন কৰে৷ ইফালে একালৰ বিস্ফোৰক বেটছমেন সেহৱাগে কয় যে বৰষুণৰ বাবে ছেমিফাইনেল উপভোগৰ পৰা আমি বঞ্চিত হ’লেও ভাৰতীয় দলটোৰ শেহতীয়া প্রদর্শনে সকলোকে গৌৰৱান্বিত কৰিছে৷ গ্রুপৰ সকলো মেচত জয়ী হোৱাৰ ফল লাভ কৰিলে ভাৰতীয় দলটোৱে৷ ভি ভি এছ লক্ষ্মণেও দলটোক অভিনন্দন জনাইছে৷ উল্লেখ্য যে ভাৰত আৰু ইংলেণ্ডৰ মাজত আজি অনুষ্ঠিত টি–২০ বিশ্বকাপৰ প্রথমখন ছেমিফাইনেল বৰষুণৰ বাবে পৰিত্যক্ত হয়৷ কিন্তু গ্রুপৰ শীর্ষ স্থানপ্রাপ্ত দল হিচাপে ভাৰতে ফাইনেলত প্রৱেশ কৰে৷