২০২২ৰ অক্টোবৰত ভাৰতত মহিলা বিশ্বকাপ ফুটবল

নিয়মীয়া বাৰ্তা ২২ মেঃ ১৭ বছৰ অনূর্ধ্ব মহিলা বিশ্বকাপ ফুটবল প্রতিযোগিতাখন অহা বর্ষত ভাৰতত অনুষ্ঠিত হ’ব৷ বিশ্ব ফুটবলৰ সর্বোচ্চ সংস্থা ফিফাই বৃহস্পতিবাৰে এই কথা সদৰী কৰিছে৷ প্রতিযোগিতাখন ২০২২ চনৰ ১১ অক্টোবৰৰ পৰা আৰম্ভ হ’ব আৰু ৩০ অক্টোবৰত সামৰণি পৰিব৷ উল্লেখ্য যে প্রতিযোগিতাখন ভাৰতত ২০২০ চনত অনুষ্ঠিত হোৱাৰ কথা আছিল যদিও সমগ্র বিশ্বৰ লগতে ভাৰততো ক’ৰোনাৰ ভয়াৱহতা বৃদ্ধি পোৱাৰ পৰিপ্রেক্ষিতত ফিফাৰ সন্মানীয় প্রতিযোগিতাখন দুবাৰকৈ স্থগিত ৰাখিবলগীয়া হয়৷

প্রথম অৱস্থাত ২০২০ চনৰ ২–২১ নৱেম্বৰলৈকে প্রতিযোগিতাখন অনুষ্ঠিত হোৱাৰ কথা আছিল যদিও ক’ৰোনাৰ প্রকোপ বৃদ্ধি পোৱাৰ বাবে প্রতিযোগিতাখন চলিত বর্ষৰ ১৭ ফেব্রুৱাৰীৰ পৰা ৭ মার্চলৈকে পিছুৱাই দিয়া হৈছিল যদিও শেহতীয়াভাৱে ভাৰতত ক’ৰোনাৰ আতংক বৃদ্ধি পোৱাত প্রতিযোগিতাখন স্থগিত ৰখাৰ সিদ্ধান্ত গ্রহণ কৰা হৈছিল৷ ১৭ বছৰ অনূর্ধ্ব মহিলা বিশ্বকাপ ফুটবল প্রতিযোগিতাখনৰ পূর্বে মহিলাসকলৰ মাজত ফুটবলৰ জনপ্রিয়তা বৃদ্ধি কৰাৰ অর্থে ফুটবল ফেডাৰেচন অৱ ইণ্ডিয়াই মুম্বাইস্থিত কুপৰেজ ষ্টেডিয়ামত অনুশীলন শিবিৰ আৰম্ভ কৰিছে৷

ইফালে, ক্রীড়া মন্ত্রালয়ৰ সৈতে লগ লাগি ফুটবল ফেডাৰেচন অৱ ইণ্ডিয়াই খেলো ইণ্ডিয়া ফুটবল প্রতিযোগিতাৰো আৰম্ভ কৰিছে৷ ফিফাৰ সন্মানীয় প্রতিযোগিতাখন অহা বর্ষত সুকলমে অনুষ্ঠিত কৰিব পাৰিব বুলি আশা ব্যক্ত কৰিছে আয়োজক ফুটবল ফেডাৰেচন অৱ ইণ্ডিয়াই৷ ক’ৰোনাৰ ভয়াৱহতাৰ বাবে ইতিমধ্যে দুবাৰকৈ স্থগিত ৰাখিবলগীয়া হোৱা সন্মানীয় প্রতিযোগিতাখন ২০২২ চনৰ অক্টোবৰত কোনো বাধা–বিঘিনি নোহোৱাকৈ আয়োজন কৰিব পাৰিব বুলি আত্মবিশ্বাসী ভাৰত৷ ইফালে, বিশ্ব ফুটবলৰ সর্বোচ্চ সংস্থাটোৱে ২০২৩ চনত অষ্ট্রেলিয়া আৰু নিউজিলেণ্ডত হ’বলগীয়া মহিলা বিশ্বকাপ ফুটবল প্রতিযোগিতাখনৰো সময়সূচী ঘোষণা কৰিছে৷ প্রতিযোগিতাখন ২০ জুলাইৰ পৰা ২০ আগষ্টলৈকে অনুষ্ঠিত হ’ব৷ মহিলা বিশ্বকাপ ফুটবল প্রতিযোগিতাখনৰ বাবে ২০২৩ চনৰ ১৭–২৩ ফেব্রুৱাৰীলৈকে নতুন পদ্ধতিত প্লে অৱ প্রতিযোগিতাখন অনুষ্ঠিত হ’ব৷ আনহাতে, ২০ বছৰ অনূর্ধ্ব মহিলা বিশ্বকাপখন ২০২২ চনৰ ১০–২৮ আগষ্টলৈ ক’ষ্টাৰিকাত অনুষ্ঠিত হ’ব বুলি ফিফাই সদৰী কৰিছে৷