নিয়মীয়া বাৰ্তা ২৫ মাৰ্চঃ ঘৰুৱা দল টীম ইণ্ডিয়াৰ বিপক্ষে শুকুৰবাৰে পুনেত খেলিবলগীয়া দ্বিতীয়খন এদিনীয়াত অংশগ্রহণ অনিশ্চিত হৈ পৰিছে ইংলেণ্ড দলটোৰ অধিনায়ক ইয়ন মৰগানৰ লগতে বেটছমেন ছাম বিলিংছৰ৷ ইংলেণ্ডৰ এই দুয়োগৰাকী তাৰকা খেলুৱৈয়ে মঙলবাৰে পুনেত হৈ যোৱা প্রথমখন এদিনীয়াত আঘাত পাইছিল৷ মেচখনত ফিল্ডিং কৰি থকাৰ সময়ত বল আয়ত্তৰ চেষ্টা কৰাৰ সময়তে মৰগানে সোঁ হাতৰ বুঢ়া আৰু কনিষ্ঠ আঙুলিত আঘাত পাইছিল৷ ইফালে, বিলিংছেও বাউণ্ডেৰী বচাবলৈ গৈ পেটত আঘাত পাইছিল৷ মেচখনত মৰগানে বেটিং কৰাৰ বাবে ১০০ শতাংশ সুস্থ নাছিল৷ এই আঘাতৰ ফলত ইংলেণ্ডৰ অধিনায়কগৰাকীৰ শুকুৰবাৰে আৰম্ভ হ’বলগীয়া দ্বিতীয়খন এদিনীয়াতো অংশগ্রহণ অনিশ্চিত হৈ পৰিছে৷ ইফালে, ছাম বিলিংছেও পেটত পোৱা আঘাতৰ পৰা সম্পূর্ণৰূপে আৰোগ্য লাভ কৰা নাই৷ ফলত দ্বিতীয়খন এদিনীয়াত মৰগান আৰু বিলিংছ অবিহনে ইংলেণ্ডে অৱতীর্ণ হোৱাৰ সম্ভাৱনা আছে৷