নিয়মীয়া বাৰ্তা, ১১ ডিচেম্বৰঃ ভাৰত আৰু অষ্ট্রেলিয়াৰ মাজত অহা ২৬ ডিচেম্বৰৰ পৰা আৰম্ভ হ’বলগীয়া ঐতিহাসিক বক্সিং ডে’ টেষ্টত দৈনিক ৩০ হাজাৰ দর্শকে ষ্টেডিয়ামত প্রৱেশ কৰিব পাৰিব৷ অষ্ট্রেলিয়াৰ ভিক্টোৰিয়া চৰকাৰে ক’ভিড প্রট’কল কিছু শিথিল কৰি এই কথা ঘোষণা কৰিছে৷ ৰাজ্যখনৰ যোৱা ৪০ দিনত ক’ভিডৰ কোনো নতুন পৰিঘটনা পোহৰলৈ নহাৰ প্রতি লক্ষ্য ৰাখি ভিক্টোৰিয়া চৰকাৰে মেলব’ন ক্রিকেট গ্রাউণ্ডত অনুষ্ঠিত হ’বলগীয়া বহুপ্রত্যাশিত মেচখনত দর্শকৰ সংখ্যা ৩০ হাজাৰলৈ বৃদ্ধি কৰিছে৷
ইয়াৰ পূর্বে বক্সিং ডে’ টেষ্টত দৈনিক ২৫ হাজাৰ দর্শকক প্রৱেশৰ অনুমতি দিয়া হৈছিল৷ শেহতীয়াকৈ অনুষ্ঠিত ভাৰত–ষ্ট্রেলিয়াৰ টি–২০ আৰু এদিনীয়া শৃংখলাৰ সময়তো ২৫ হাজাৰ দর্শকে ষ্টেডিয়ামত প্রৱেশৰ অনুমতি লাভ কৰিছিল৷ উল্লেখ্য যে অহা ১৭ ডিচেম্বৰত এডিলেইডত ভাৰতে টেষ্ট শৃংখলাৰ প্রথমখন মেচ খেলিব৷