ছমাহৰ বিশ্রামে নতুন জীৱন দিছে অষ্ট্রেলিয়ান অধিনায়ক আৰ’ন ফিনছক

নিয়মীয়া বাৰ্তা, ২০ আগষ্টঃ দীঘলীয়া লকডাউনৰ ফলত লাভ কৰা ছমাহৰ বিশ্রামে নতুন জীৱন দিছে অষ্ট্রেলিয়ান অধিনায়ক আৰ’ন ফিনছক৷ ইয়াৰ বাবে তেওঁ ২০২৩ত ভাৰতত অনুষ্ঠিত হ’বলগীয়া এদিনীয়া বিশ্বকাপ খেলাৰ লক্ষ্য লৈছে৷

মেলব’ৰ্নৰ সংবাদ মাধ্যমৰ আগত আজি এই কথা সদৰী কৰে অষ্ট্রেলিয়াৰ তাৰকা বেটছমেন তথা সীমিত অভাৰ দলৰ অধিনায়ক ফিনছে৷ ‘প্রায় ছমাহৰ বিৰতিৰ পিছত মোৰ ক্রিকেট কেৰিয়াৰে নতুন জীৱন লাভ কৰিছে৷ এতিয়া মই ২০২৩লৈ অবিৰাম গতিত খেলি থাকিব বিচাৰোঁ৷

ভাৰতত অনুষ্ঠিত হ’বলগীয়া ২০২৩ৰ এদিনীয়া বিশ্বকাপত দেশক প্রতিনিধিত্ব কৰাৰ লক্ষ্যৰে এতিয়াৰে পৰাই নিজকে সাজু কৰিম৷’ ফিনছে কয়৷ উল্লেখ্য যে অহা ৪ ছেপ্টেম্বৰৰ পৰা ইংলেণ্ডৰ বিৰুদ্ধে আৰম্ভ হ’বলগীয়া টি–২০ আৰু এদিনীয়া শৃংখলাত ফিনছ বাহিনীয়ে প্রত্যাৱর্তন ঘটাব৷