নিয়মীয়া বাৰ্তা, ২ জানুৱাৰীঃ ৪১ বছৰীয়া হ’লেও এতিয়াই ক্রিকেটক বিদায় জনোৱাৰ মন নাই ক্রিছ গেইলৰ৷ ৱেষ্ট ইণ্ডিজৰ বিস্ফোৰক বাঁওহতীয়া বেটছমেনগৰাকীয়ে আৰু পাঁচ বছৰ আন্তঃৰাষ্ট্রীয় ক্রিকেট খেলাৰ সপোন পুহি ৰাখিছে৷ ৰাষ্ট্রীয় সংবাদ প্রতিষ্ঠান এ এন আইৰ সৈতে হোৱা এক সাক্ষাৎকাৰত গেইলে আজি এই কথা প্রকাশ কৰে৷ ‘এতিয়াই অৱসৰৰ কোনো চিন্তা কৰা নাই৷ মই আত্মবিশ্বাসী যে পুনৰ পাঁচ বছৰ খেলিব পাৰিম৷ অর্থাৎ ৪৫ বছৰীয়া হোৱাৰ পূর্বে অৱসৰৰ কথা চিন্তা নকৰোঁ৷ এতিয়াও সন্মুখত দুখনকৈ টি–২০ বিশ্বকাপ আছে৷’ গেইলে এইদৰে কয়৷
উল্লেখ্য যে সদ্যসমাপ্ত আই পি এলত কেৰিবিয়ান তাৰকাগৰাকীয়ে বিস্ফোৰক বেটিঙেৰে মাত্র সাতটা ইনিংছত ২৮৮ ৰান সংগ্রহ কৰিবলৈ সক্ষম হৈছিল৷ কিংছ একাদশ পঞ্জাবৰ হৈ খেলা বেটছমেনগৰাকীয়ে এখন মেচত ৯৯ ৰানৰ আক্রমণাত্মক ইনিংছসহ মুঠ তিনিটা অর্ধশতক অর্জন কৰিছিল৷