নিয়মীয়া বাৰ্তা, ২৩ জুলাই : শ্রীলংকাত নহয়, আসন্ন এছিয়া কাপ অনুষ্ঠিত হ’ব সংযুক্ত আৰব আমিৰশ্বাহী (ইউএই)ত৷ শ্রীলংকাৰ পৰিস্থিতি এতিয়াও স্বাভাৱিক হোৱা নাই৷ এনে পৰিস্থিতিত দেশখনত এছিয়া কাপ অনুষ্ঠিত কৰিব পৰা সম্ভৱ নহ’ব বুলি দেশখনৰ ক্রিকেট ব’র্ডে জানিবলৈ দিয়াৰ পিছতে স্থান সলনি কৰা হৈছে৷ কালি বিচিচিআইৰ এপেক্স কাউন্সিলৰ বৈঠকৰ অন্তত ব’ডৰ অধ্যক্ষ সৌৰভ গাংগুলীয়ে কয়, ‘সংযুক্ত আৰব আমিৰশ্বাহীয়ে একমাত্র স্থান, য’ত এই সময়ত বৰষুণ নহয়৷ ফলত এছিয়া কাপ তাতেই অনুষ্ঠিত হ’ব৷’ উল্লেখ্য যে এছিয়া কাপ অনুষ্ঠিত কৰাক লৈ যথেষ্ট টনা–আঁজোৰা হৈছিল৷ ক’ৰোনাৰ বাবে ইয়াৰ আগতে কেইবাবাৰো প্রতিযোগিতাখন পিছুৱাই দিয়া হয়৷ প্রায় ডেৰ বছৰ ধৰি এছিয়া কাপ আয়োজনক লৈ অনিশ্চয়তাই দেখা দিলেও এইবাৰ এছিয়ান ক্রিকেট কাউঞ্চিলে প্রতিযোগিতাখন শ্রীলংকাৰ শেহতীয়া পৰিস্থিতিৰ বাবে তাত অনুষ্ঠিত কৰিব বিচৰা নাই৷ বাংলাদেশ আৰু ভাৰতেও প্রতিযোগিতাখন আয়োজনৰ বাবে আগ্রহ প্রকাশ কৰিছিল যদিও অৱশেষত ইউএইতে অনুষ্ঠিত হ’ব এছিয়া কাপ৷