১,৬৭৫ কোটি হেৰুৱাব বিচিচিআয়ে

নিয়মীয়া বাৰ্তা, ২০ জুনঃ লাডাখত ভাৰতীয় সেনাৰ ওপৰত চীনা সৈন্যৰ বর্বৰ আক্রমণৰ পিছতে  দেশজুৰি চীনৰ বিৰুদ্ধে বিক্ষোভৰ জুই জ্বলিছে৷ চীনা সামগ্রী বর্জনেৰে চীনক অর্থনৈতিকভাৱে আঘাত হানিবলৈ দেশৰ চৌদিশে দাবী উত্থাপন হোৱাৰ সময়তে অস্বস্তিৰ সন্মুখীন হৈছে ভাৰতীয় ক্রিকেট নিয়ন্ত্রণ ব’ৰ্ড৷ কিয়নো, দেশৰ ক্রিকেটৰ সর্বোচ্চ সংস্থাটোৱে স্পনছ’ৰশ্বিপ চুক্তিত আবদ্ধ হৈ থকা অধিকাংশ কোম্পানী হ’ল চাইনিজ৷

দেশত চীনা সামগ্রী অথবা চাইনিজ কোম্পানী বর্জনৰ সিদ্ধান্ত কার্যকৰী হ’লে অতি কমেও ১,৬৭৫ কোটি টকাৰ লোকচানৰ সন্মুখীন হ’ব বি চি চি আই৷ এই বৃহৎ পৰিমাণৰ স্পনছ’ৰশ্বিপ ডীলত লোকচানৰ সন্মুখীন হোৱাৰ সমান্তৰালকৈ ব’র্ডে চাইনিজ কোম্পানীৰ পৰা লাভ কৰা প্রায় এহেজাৰ কোটিৰ বিজ্ঞাপন ৰাজহো হেৰুৱাবলগীয়া হ’ব৷

উল্লেখ্য যে বিশ্বৰ সবাতোকৈ ঐশ্বর্যশালী ক্রিকেট ব’ৰ্ড বি চি চি আয়ে আই পি এলৰ টাইটেল স্পনছ’ৰৰ বাবে চাইনিজ কোম্পানী ভিভ’ৰ পৰা পাঁচ বছৰৰ বাবে ২,২০০ কোটি লাভ কৰে৷ একেদৰে পে টি এমৰ সৈতে ৩২৬ কোটি, ড্রীম ইলেভেনৰ সৈতে ২১০ কোটি, ছুইগিৰ সৈতে ৫০ কোটি, বাইঝুৰ সৈতে ১,০৭৯ কোটিৰ বৃহৎ লেনদেন চুক্তিত আবদ্ধ হৈ আছে৷ আই পি এলৰ টাইটেল স্পনছ’ৰ চুক্তিৰ বিনিময়ত ভিভ’ৱে ব’ৰ্ডক ইতিমধ্যে ৪৫০ কোটি আগবঢ়াইছে যদিও পৰৱর্তী দুবছৰৰ বাবে ৯০০ কোটি আদায় দিবলগীয়া আছে৷

একেদৰে পে টি এমৰ পৰা ব’র্ডে ১৮০ কোটি, ড্রীম ইলেভেনৰ পৰা ১৫০ কোটি, ছুইগিৰ পৰা ২৫ কোটি, বাইঝুৰ পৰা ৪২০ কোটি পাবলগীয়া হৈ আছে৷ চৰকাৰে চাইনিজ কোম্পানী ভাৰতত নিষিদ্ধ কৰিলে ভাৰতীয় ক্রিকেট নিয়ন্ত্রণ ব’র্ডে এই চাইনিজ কোম্পানীসমূহৰ পৰা লাভ কৰিবলগীয়া বৃহৎ পৰিমাণৰ ধনৰাশি হেৰুৱাবলগীয়া হ’ব৷ ইফালে, এই সন্দর্ভত ব’ৰ্ডৰ কোষাধ্যক্ষ অৰুণ ধুমালে প্রতিক্রিয়া ব্যক্ত কৰিছে৷ তেওঁ কৈছে যে আই পি এলত চাইনিজ স্পনছ’ৰশ্বিপে ভাৰতীয় অর্থনীতিক সহায় কৰি আছে৷

‘সমগ্র দেশ এতিয়া আৱেগিক হৈ আছে৷ আমাৰ বীৰ সেনাসকলৰ ওপৰত চীনৰ বর্বৰ আক্রমণক সকলোৱে ধিক্কাৰ দিছে৷ কিন্তু আই পি এলত চাইনিজ স্পনছ’ৰশ্বিপে ভাৰতীয় অর্থনীতিকহে সহায় কৰিছে৷ ইয়াৰ দ্বাৰা চীন উপকৃত হোৱা নাই৷ আমি আমাৰ দেশৰ সুবিধাৰ বাবেহে চাইনিজ কোম্পানীৰ স্পনছ’ৰশ্বিপ গ্রহণ কৰিছোঁ৷ তেওঁলোকক সহযোগ কৰিবলৈ যোৱা নাই৷’ ধুমালে এইদৰে কয়৷

মন কৰিবলগীয়া যে ভাৰত–চীন সীমান্তৰ লাডাখস্থিত গলৱান উপত্যকাত দুদিন পূর্বে চীনা সৈন্যৰ বর্বৰ আক্রমণত ভাৰতৰ ২০গৰাকীকৈ সেনাই প্রাণ হেৰুৱাবলগীয়া হৈছিল৷ ইয়াৰ পিছতে সমগ্র দেশত চীনা সামগ্রী বর্জনৰ দাবী উঠিছে৷