নিয়মীয়া বাৰ্তা ,৩০ জানুৱাৰীঃ চলিত বর্ষৰ আই পি এলৰ বাবে অহা ১২–১৩ ফেব্রুৱাৰীত বাংগালুৰুত অনুষ্ঠিত হ’বলগীয়া মেগা নিলামত দেশ–বিদেশৰ মুঠ ১,২১৪গৰাকী খেলুৱৈয়ে নাম পঞ্জীয়ন কৰিছে৷ ইয়াৰে ভিতৰত অন্যতম হ’ল ভূটানৰ মিকিয়ো দর্জী৷ নেপালৰ এভাৰেষ্ট প্রিমিয়াৰ লীগত চমকপ্রদ প্রদর্শনেৰে ক্রিকেটপ্রেমীৰ দৃষ্টি আকর্ষণ কৰা দর্জীয়ে ভূটানৰ প্রথমগৰাকী খেলুৱৈ হিচাপে আই পি এলৰ নিলামত অন্তর্ভুক্ত হৈছে৷ মেগা নিলামলৈ মাজত মাথোঁ কেইটামান দিন বাকী থকা অৱস্থাত উদীয়মান ক্রিকেটাৰগৰাকীয়ে চেন্নাই ছুপাৰকিংছৰ অধিনায়ক মহেন্দ্র সিং ধোনীৰ সৈতে উঠা এক ফটো ছ’চিয়েল মিডিয়াত শ্বেয়াৰ কৰিছে৷ দর্জীয়ে যোৱা বছৰ ধোনীক সাক্ষাৎ কৰিছিল আৰু তেওঁৰ পৰা ক্রিকেটৰ বিভিন্ন টিপ্ছ লাভ কৰিছিল বুলি ভূটানৰ খেলুৱৈগৰাকীয়ে প্রকাশ কৰিছে৷
মন কৰিবলগীয়া যে ভূটানে ২০১৯ত আই চি চিৰ সহযোগী সদস্যৰ স্বীকৃতি লাভ কৰিছিল৷ তেতিয়াৰে পৰা দলটোৱে দুখন আন্তঃৰাষ্ট্রীয় টি–২০ খেলাৰ সুযোগ পাইছে৷ মালদ্বীপ আৰু নেপালৰ বিৰুদ্ধে খেলা মেচ দুখনত দর্জীয়ে ভূটানক প্রতিনিধিত্ব কৰিছিল৷