নিয়মীয়া বাৰ্তা ২৬ আগষ্টঃ ৱেষ্ট ইণ্ডিজৰ অভিজ্ঞ তাৰকা ক্রিছ গেইলক লৈ কিংছ একাদশ পঞ্জাব যথেষ্ট আশাবাদী৷ আই পি এলত গেইলৰ দীঘলীয়া অভিজ্ঞতাই পঞ্জাব দলক উপকৃত কৰিব৷ এই মন্তব্য আগবঢ়াইছে কিংছ একাদশ পঞ্জাবৰ নৱনিযুক্ত অধিনায়ক কে এল ৰাহুলে৷ আই পি এলৰ অফিচিয়েল ৱেবছাইটত প্রকাশ পোৱা এটা ভিডি’ত তাৰকা বেটছমেনগৰাকীয়ে কৈছে যে গেইল তেওঁলোকৰ ক’ৰ গ্রুপৰ অন্যতম গুৰুত্বপূর্ণ সদস্য৷ যিকোনো মুহূর্তত খেলৰ গতি সলনি কৰিব পৰাৰ সক্ষমতা থকা গেইলে আগন্তুক আই পি এলত কিংছ একাদশ পঞ্জাবৰ ৰণনীতি তৈয়াৰত গুৰুত্বপূর্ণ ভূমিকা গ্রহণ কৰিব৷
উল্লেখ্য যে কিংছ একাদশ পঞ্জাবৰ হৈ গেইলে এইপর্যন্ত ২৪খন মেচ খেলি ৮৫৮ ৰান সংগ্রহ কৰিবলৈ সক্ষম হৈছে৷ ২০১৮ৰ ছিজনত তেওঁ দলটোৰ হৈ ১০৪ ৰানৰ অপৰাজিত ইনিংছ খেলিছিল৷ ইউ এ ইত অহা ১৯ ছেপ্ঢেম্বৰৰ পৰা আৰম্ভ হ’বলগীয়া আই পি এলত অধিনায়ক লোকেশ ৰাহুলৰ সৈতে গেইলে ইনিংছ মুকলি কৰাৰ পূর্ণ সম্ভাৱনা আছে৷ ৱেষ্ট ইণ্ডিজৰ বিস্ফোৰক বাঁওহতীয়া বেটছমেনগৰাকী দুই–এদিনৰ ভিতৰতে ডুবাইত উপস্থিত হোৱাৰ কথা আছে৷