নিয়মীয়া বাৰ্তা, ২৭ ডিচেম্বৰঃ আই এছ এলত প্রথমবাৰৰ বাবে প্রতিদ্বন্দ্বিতা আগবঢ়োৱা দেশৰ আগশাৰীৰ ফুটবল ক্লাব কলকাতাৰ ঐতিহ্যমণ্ডিত ইষ্ট বেংগলে প্রতিযোগিতাখনত এতিয়াও জয়ৰ মুখ দেখা নাই৷ দলটোৱে কালি গোৱাত চলি থকা আই এছ এলত নিজৰ সপ্তমখন মেচত চেন্নাইন এফ চিৰ বিৰুদ্ধে ২–২ গ’লত ড্র খেলে৷
তীব্র উত্তেজনাপূর্ণ মেচখনত চেন্নাইন এফ চিয়ে ১৩ মিনিটত প্রথমটো অগ্রগতি লাভ কৰে৷ এল ছাংটেই ১৩ মিনিটত গ’লটো কৰিবলৈ সক্ষম হয়৷ অৱশ্যে ৫৯ মিনিটত ষ্টেইনমেনে এটা গ’ল কৰি ইষ্ট বেংগলৰ হৈ মেচত সমতা স্থাপন কৰে৷ কিন্তু ৬৪ মিনিটত চেন্নাইন এফ চিয়ে আৰ আলীৰ গ’লৰ সহায়ত পুনৰ অগ্রগতি অর্জন কৰে৷
অৱশ্যে ৬৮ মিনিটত ইষ্ট বেংগলে দ্বিতীয়টো গ’ল কৰি মেচত পুনৰ সমতা স্থাপন কৰিবলৈ সক্ষম হয়৷ ষ্টেইনমেনে দলটোৰ হৈ দ্বিতীয়টো গ’ল কৰে৷ এই মুহূর্তত চেন্নাইন এফ চিয়ে ৯ পইণ্টেৰে সপ্তম স্থানত আৰু ইষ্ট বেংগলে তিনি পইণ্টেৰে দশম স্থানত আছে৷ দলটোৱে তিনিখনত ড্র খেলাৰ বিপৰীতে চাৰিখনত পৰাজয়ৰ সন্মুখীন হৈছে৷
আজিৰ খেল
কেৰালা ব্লাষ্টার্ছ
বনাম
হায়দৰাবাদ এফ চি
সময়ঃ সন্ধিয়া ৭.৩০ বজা৷