নিয়মীয়া বাৰ্তা ১৩ ছেপ্টেম্বৰঃ ভাৰত–ইংলেণ্ডৰ মাজত মানচেষ্টাৰত অনুষ্ঠিত হ’বলগীয়া পঞ্চম তথা অন্তিম টেষ্ট নাটকীয়ভাৱে বাতিল হোৱাক লৈ ক্রিকেট মহলত বিভিন্ন প্রশ্ণৰ অৱতাৰণা হোৱাৰ সময়তে সমগ্র ঘটনাই নতুন মোৰ লৈছে৷ ইংলেণ্ড এণ্ড ৱেলছ ক্রিকেট ব’ডৰ সৈতে সর্বসন্মত সিদ্ধান্ত মর্মে মানচেষ্টাৰ টেষ্ট বাতিল হোৱা বুলি বি চি চি আয়ে দাবী কৰিলেও মেচখনৰ নাটকীয় পৰিসমাপ্তিক লৈ সন্তুষ্ট নহয় ইংলেণ্ড৷ আৰম্ভ হোৱাৰ প্রায় ডেৰঘণ্টা পূর্বে আকস্মিকভাৱে অন্তিম টেষ্ট বাতিল হোৱাত বৃহৎ আর্থিক ক্ষতিৰ সন্মুখীন হোৱাৰ পিছত ইংলেণ্ড ক্রিকেট ব’র্ডে মেচখনৰ ফলাফল বিচাৰি আই চি চিৰ দ্বাৰস্থ হৈছে৷ মানচেষ্টাৰ টেষ্টৰ ফলাফল নির্ণয় কৰিবলৈ বিশ্ব ক্রিকেটৰ সর্বোচ্চ সংস্থাটোলৈ ই চি বিয়ে আনুষ্ঠানিকভাৱে পত্র প্রেৰণ কৰিছে বুলি আজি জানিব পৰা গৈছে৷
ই চি বিৰ মুখপাত্রই সংবাদ মাধ্যমৰ আগত প্রকাশ কৰা অনুসৰি তেওঁলোকে বিষয়টোৰ মীমাংসা বিচাৰি আই চি চিৰ সংঘাত নিৰাময় কমিটীলৈ পত্র প্রেৰণ কৰিছে৷ বাতিল হোৱা মেচখনৰ এক নিশ্চিত ফলাফল লাভ কৰিলেহে তেওঁলোকে বীমাৰ ধন দাবী কৰিব পাৰে বুলি ই চি বিৰ মুখপাত্রগৰাকীয়ে জানিবলৈ দিয়ে৷ তেওঁ লগতে কয় যে মানচেষ্টাৰ টেষ্ট বাতিলৰ ফলত ইংলেণ্ড ক্রিকেট ব’র্ডে প্রায় ৪০ মিলিয়ন পাউণ্ড ক্ষতিৰ সন্মুখীন হৈছে৷ উল্লেখ্য যে আই চি চিয়ে মেচখন পৰিত্যক্ত বুলি ঘোষণা কৰিলে ভাৰতে ২–১ৰ ব্যৱধানত শৃংখলা জয় কৰিব৷ ইয়াৰ বিপৰীতে ক’ভিডৰ প্রাদুর্ভাৱৰ বাবে ভাৰতে মেচখন ইংলেণ্ডক এৰি দিবলৈ বাধ্য বুলি আই চি চিয়ে ঘোষণা কৰিলে ঘৰুৱা দলটোৱে ২–২ৰ ব্যৱধানত শৃংখলাত সমতা স্থাপন কৰিব পাৰিব৷ অৱশ্যে ই চি বিৰ পৰা পত্র লাভ কৰা বুলি আই চি চিয়ে এতিয়ালৈকে আনুষ্ঠানিকভাৱে প্রকাশ কৰা নাই৷ মন কৰিবলগীয়া যে বি চি চি আইৰ সৈতে হোৱা বৈঠকত ই চি বিয়ে বাৰম্বাৰ আহ্বান জনাইছিল যে অন্তিম টেষ্টত ভাৰতে অংশ ল’ব নোৱৰাত ইংলেণ্ডক জয়ী ঘোষণা কৰা উচিত৷ কিন্তু বি চি চি আয়ে ইংলেণ্ডৰ এই প্রস্তাৱ মানি ল’বলৈ সন্মত নহয় আৰু পৰৱর্তী সময়ত মেচখন পুনৰ আয়োজন কৰিব বুলি আশ্বাস দিয়ে৷