নিয়মীয়া বাৰ্তা ২৮ নৱেম্বৰঃ এদিনীয়া ক্রিকেটত সর্বাধিক ৰান ব্যয় কৰা ভাৰতীয় স্পীনাৰ হিচাপে অনাকাংক্ষিত অভিলেখৰ গৰাকী হৈছে য়ুজবেন্দ্র চাহাল৷ টীম ইণ্ডিয়াৰ তাৰকা লেগ স্পীনাৰগৰাকীয়ে শুকুৰবাৰে অষ্ট্রেলিয়াৰ বিৰুদ্ধে প্রথম এদিনীয়াত ১০ অভাৰত ৮৯ ৰান ব্যয় কৰে৷ আমোদজনক দিশটো হ’ল লেগ স্পীনাৰগৰাকীয়ে নিজৰে পূর্বৰ অভিলেখ ভংগ কৰি এই অনাকাংক্ষিত অভিলেখৰ গৰাকী হয়৷ ইয়াৰ পূর্বে তেওঁ ২০১৯ৰ এদিনীয়া বিশ্বকাপত ইংলেণ্ডৰ বিৰুদ্ধে এখন মেচত ৮৮ ৰান ব্যয় কৰিছিল৷ অৱশ্যে বেগী বলাৰ হিচাপে এই অনাকাংক্ষিত অভিলেখৰ গৰাকী হ’ল ভুবনেশ্বৰ কুমাৰ৷ তেওঁ দক্ষিণ আফ্রিকাৰ বিৰুদ্ধে ২০১৫ত এখন এদিনীয়াত ১০৬ ৰান ব্যয় কৰিছিল৷ ইফালে, টীম ইণ্ডিয়াৰ হার্দিক পাণ্ডিয়াই আজি দ্রুততম ভাৰতীয় হিচাপে এক হাজাৰ এদিনীয়া ৰান সম্পূর্ণ কৰিবলৈ সক্ষম হয়৷ এদিনীয়াত এক হাজাৰ ৰানৰ মাইলষ্ট’নত উপনীত হ’বলৈ তেওঁ মাত্র ৮৫৭টা বল খেলে৷ ৱেষ্ট ইণ্ডিজৰ অলৰাউণ্ডাৰ আন্দ্রে ৰাছেলে ৭৮৭ বল খেলি এক হাজাৰ এদিনীয়া ৰান সম্পূর্ণ কৰি এই অভিলেখৰ তালিকাৰ শীর্ষত আছে৷