নিয়মীয়া বাৰ্তা ২৯ মেঃ ইংলেণ্ডৰ ছাউদাম্পটনত অহা ১৮–২২ জুনত অনুষ্ঠিত হ’বলগীয়া বিশ্ব টেষ্ট চেম্পিয়নশ্বিপৰ ফাইনেল ড্র অথবা টাই হ’লে ভাৰত আৰু নিউজিলেণ্ড উভয় দলকে যুগ্ম বিজয়ী ঘোষণা কৰা হ’ব৷ বিশ্ব ক্রিকেটৰ সর্বোচ্চ সংস্থা আইচিচিয়ে আজি আনুষ্ঠানিকভাৱে এই কথা সদৰী কৰে৷
‘বিশ্ব টেষ্ট চেম্পিয়নশ্বিপৰ ফাইনেলৰ ফলাফল নির্ণয়ৰ বাবে অতিৰিক্ত দিন খেলোৱা নহয়৷ নির্ধাৰিত ৫ দিনৰ ভিতৰত মেচখন অমীমাংসিতভাৱে সামৰণি পৰিলে উভয় দলকে চেম্পিয়ন ঘোষণা কৰা হ’ব৷ অৱশ্যে নির্ধাৰিত ৫ দিনত বৰষুণ অথবা বেয়া বতৰৰ বাবে সময় নষ্ট হ’লে সেইখিনি সময় সম্পূর্ণ কৰিবলৈ ৰিজার্ভ ডে’ৰ ব্যৱস্থা থাকিব৷ এই বিষয়ত আইচিচিৰ মেচ ৰেফাৰীয়ে মেচৰ সময়ত উভয় দলকে নিয়মসমূহ অৱগত কৰাই থাকিব৷’– আইচিচিয়ে এইদৰে কয়৷
ইফালে, ফাইনেল মেচখন গ্রেড–১ ডিউক বলেৰে খেলোৱা হ’ব বুলিও আচিচিয়ে স্পষ্ট কৰিছে৷ সাধাৰণতে ভাৰতে ঘৰৰ মাটিত এছজি বল আৰু নিউজিলেণ্ডে ঘৰৰ মাটিত ক’কাবুৰা বল ব্যৱহাৰ কৰে৷ আইচিচিয়ে আৰম্ভণিতে বিশ্ব টেষ্ট চেম্পিয়নশ্বিপৰ বাবে অতিৰিক্ত দিন সংযুক্ত কৰাৰ কথা চিন্তা–চর্চা কৰিছিল যদিও শেষ মুহূর্তত পৰম্পৰাগত নীতি বাহাল ৰাখি পাঁচদিনৰ ভিতৰতে মেচ সমাপ্ত কৰাৰ সিদ্ধান্ত গ্রহণ কৰে৷