নিয়মীয়া বাৰ্তা, ৩ অক্টোবৰঃ কলকাতা নাইট ৰাইডার্ছৰ হাতত শোচনীয় পৰাজয়ৰ সন্মুখীন হোৱা ৰাজস্থান ৰয়েলছে চলিত আই পি এলত জয়ৰ ধাৰালৈ উভতি অহাৰ লক্ষ্যৰে আজি পুনৰ খেলপথাৰত নামিব৷ আবু ধাবিৰ শ্বেইখ জায়েদ ষ্টেডিয়ামত অনুষ্ঠিত হ’বলগীয়া দিনটোৰ প্রথমখন মেচত ষ্টিভেন স্মিথ নেতৃত্বাধীন দলটোৰ প্রতিদ্বন্দ্বী হ’ব ৰয়েল চেলেঞ্জার্ছ বাংগালুৰু৷ ডিফেণ্ডিং চেম্পিয়ন মুম্বাই ইণ্ডিয়ানছক শেহতীয়া মেচত পৰাস্ত কৰি আত্মবিশ্বাসী হৈ থকা বাংগালুৰুক প্রতিহত কৰাটো আজি ৰাজস্থানৰ বাবে প্রত্যাহ্বানজনক হ’ব৷ অধিনায়ক বিৰাট কোহলি, এবি ডি ভিলিয়ার্ছ, আৰন ফিনছ আদিৰ দৰে বিস্ফোৰক বেটছমেনেৰে গঠিত আৰ চি বিৰ বেটিং বিভাগৰ বিৰুদ্ধে জ’ফ্রা আর্চাৰ, জয়দেৱ উনাডকাট, শ্রেয়াছ গোপালৰ বলিং লক্ষণীয় হ’ব৷ ইফালে, শেহতীয়া মেচখনত বেটিং ব্যর্থতাৰ বাবে পৰাজয়ৰ সন্মুখীন হোৱা ৰাজস্থান ৰয়েলছে আজি ডেভিদ মিলাৰক মূল একাদশত স্থান দিয়াৰ পূর্ণ সম্ভাৱনা আছে৷ দুর্বল ফর্মৰ বাবে আজি ৰবীন উথাপ্পায়ো স্থান হেৰুৱাব পাৰে৷ উল্লেখ্য যে ৰাজস্থানে প্রথম দুখন মেচত চেন্নাই ছুপাৰ কিংছ আৰু কিংছ একাদশ পঞ্জাবক পৰাস্ত কৰিছে৷
খেলৰ সময়: বিয়লি ৩.৩০ বজা৷
শ্বাৰজাহত কলকাতা–দিল্লী
ৰাজস্থান ৰয়েলছক বিধ্বস্ত কৰি আত্মবিশ্বাসী হৈ থকা কলকাতা নাইট ৰাইডার্ছে আজি আই পি এলত দিল্লী কেপিটেলছৰ মুখামুখি হ’ব৷ শ্বাৰজাহত অনুষ্ঠিত হ’বলগীয়া মেচখনত দীনেশ কার্তিক নেতৃত্বাধীন কলকাতাই জয়ৰ ধাৰা অব্যাহত ৰখাৰ লক্ষ্যৰে খেলপথাৰত নমাৰ বিপৰীতে দিল্লী কেপিটেলছে শেহতীয়া পৰাজয় পাহৰি প্রত্যাৱর্তনৰ সংকল্প লৈছে৷ উল্লেখ্য যে শ্রেয়াছ আয়াৰ নেতৃত্বাধীন দিল্লী কেপিটেলছে প্রথমখন মেচত শক্তিশালী চেন্নাই ছুপাৰ কিংছক পৰাস্ত কৰি আই পি এলত সুন্দৰ আৰম্ভণি ঘটায় যদিও পৰৱর্তী মেচত ছানৰাইজার্ছ হায়দৰাবাদৰ হাতত শোচনীয় পৰাজয়ৰ সন্মুখীন হয়৷ অধিনায়ক আয়াৰৰ লগতে শিখৰ ধাৱন, পৃথ্বি শ্ব, ঋষভ পণ্ট, ছিমৰন হেটমায়াৰ, মার্কাছ ষ্টইনিছ আদিৰ দৰে বিস্ফোৰক বেটছমেনেৰে গঠিত দলটোৱে আজি শ্বাৰজাহৰ তুলনামূলকভাৱে সৰু গ্রাউণ্ডত ৰানৰ জোৱাৰ তুলি পুনৰ জয়ৰ ধাৰালৈ ওভতাৰ লক্ষ্য লৈছে৷ ইয়াৰ বাবে দলটোৱে শিখৰ ধাৱন আৰু ঋষভ পণ্টৰ পৰা দীঘলীয়া ইনিংছ আশা কৰিব৷ অলৰাউণ্ডাৰ ষ্টইনিছে ইতিমধ্যে প্রত্যাশিত প্রদর্শনেৰে দলৰ ভাৰসাম্যতা বৃদ্ধি কৰিছে৷ বলিঙত কাগিছ’ ৰাবাডা, অমিত মিশ্র আৰু অক্ষৰ পেটেলৰ ওপৰত দিল্লী কেপিটেলছৰ সাফল্য নির্ভৰ কৰিব৷ আন্দ্রে ৰাছেল, ইয়ন মৰগান, শুভমন গীল আৰু নীতিশ ৰাণাৰ দৰে বিস্ফোৰক বেটছমেনক নিয়ন্ত্রণত ৰখাটো আজি কাগিছ’ ৰাবাডা আৰু অমিত মিশ্রৰ বাবে প্রধান প্রত্যাহ্বান হ’ব৷
খেলৰ সময়: সন্ধিয়া ৭.৩০ বজা৷