নিয়মীয়া বাৰ্তা ১৪ ডিচেম্বৰঃ আগন্তুক আইপিএলত ৰাজ্যৰ ক্রিকেটপ্রেমীয়ে গুৱাহাটীৰ এটি দলক দেখিবলৈ পোৱাৰ সম্ভাৱনা আছে৷ ভাৰতীয় ক্রিকেট নিয়ন্ত্রণ ব’র্ডে আগন্তুক বর্ষৰ আইপিএলত দুটাকৈ নতুন দল অন্তর্ভুক্ত কৰিবলৈ যো–জা চলাই থকাৰ সময়তে অসম ক্রিকেট সন্থাৰ সম্পাদক দেৱজিৎ শইকীয়াই আজি কয় যে গুৱাহাটীৰ পৰা এটা আইপিএলৰ ফ্রেনচাইজী তৈয়াৰ কৰিবলৈ অসম ক্রিকেট সন্থাই সমগ্র উত্তৰ–পূর্বাঞ্চলৰ ক্রিকেট সন্থাসমূহৰ সহযোগত প্রচেষ্টা আৰম্ভ কৰিছে৷ বিচিচিআইৰ আগন্তুক বার্ষিক সাধাৰণ সভাত অসম ক্রিকেট সন্থাই বিষয়টো গুৰুত্বসহকাৰে উত্থাপন কৰিব৷ উল্লেখ্য যে আগন্তুক বর্ষৰ আইপিএলত আহমেদাবাদৰ পৰা এটা ফ্রেনচাইজী গঠন হোৱাটো একপ্রকাৰ নিশ্চিত হৈছে যদিও আনটো ফ্রেনচাইজী এতিয়ালৈকে নিশ্চিত হোৱা নাই৷ ইফালে, অসম ক্রিকেট সন্থাই আজি এক অনুষ্ঠানত ৯১ য়ার্ডছ ক্লাব নামৰ এটা ক্লাব হাউছৰ আধাৰশিলা স্থাপন কৰে৷ একেদৰে ৰাজ্যিক ক্রিকেট একাডেমীৰ ‘পে এণ্ড প্লে স্কিম’ নামৰ এক প্রশিক্ষণ কার্যসূচীও মুকলি কৰা হয়৷ অনুষ্ঠানত এ চি এৰ বিষয়ববীয়াৰ লগতে প্রাক্তন ৰঞ্জি ক্রিকেটাৰ বাদল ঠাকুৰো উপস্থিত থাকে৷