জিলা পর্যায়ত স্থাপন কৰা হ’ব এহেজাৰ খেলো ইণ্ডিয়া কেন্দ্র

নিয়মীয়া বাৰ্তা, ২০ জুনঃ ভাৰতক ক্রীড়াৰ ছুপাৰ পাৱাৰ কৰি তোলাৰ লক্ষ্যৰে ক্রীড়া মন্ত্রালয়ে অভিলাষী আঁচনি হাতত লৈছে৷ এই অনুসৰি দেশজুৰি জিলা পর্যায়ত ১০০০টা খেলো ইণ্ডিয়া কেন্দ্র স্থাপন কৰা হ’ব৷ কেন্দ্রীয় ক্রীড়ামন্ত্রী কিৰেন ৰিজিজুৱে আজি এই কথা ঘোষণা কৰে৷

তেওঁ কয় যে ভাৰতক ক্রীড়াৰ ছুপাৰ পাৱাৰ কৰি তুলিবলৈ আমি যুৱ প্রজন্মৰ বাবে ক্রীড়াক এক উজ্জ্বল কেৰিয়াৰ হিচাপে গঢ়ি তুলিব লাগিব৷ খেলুৱৈ এগৰাকীৰ ভৱিষ্যৎ সম্পূর্ণৰূপে নিৰাপদ হ’লেহে অভিভাৱকে নিজৰ সন্তানক খেলক কেৰিয়াৰ হিচাপে গ্রহণৰ অনুমতি দিব৷

এনে এক পৰিৱেশ সৃষ্টিৰ সপোন লৈ আমি দেশৰ চৌদিশে জিলা পর্যায়ত এক হাজাৰ খেলো ইণ্ডিয়া কেন্দ্র স্থাপনৰ প্রয়াস আৰম্ভ কৰিছোঁ৷ এগৰাকীকৈ প্রাক্তন চেম্পিয়ন খেলুৱৈয়ে এই কেন্দ্রসমূহ পৰিচালনা কৰিব৷

দেশৰ প্রতিটো প্রান্তৰ পৰা প্রতিভাৱান খেলুৱৈ চিনাক্ত কৰাই এই কেন্দ্রসমূহৰ প্রধান উদ্দেশ্য হ’ব৷ জিলা পর্যায়ৰ খেলো ইণ্ডিয়া কেন্দ্রসমূহত আর্চাৰী, এথলেটিকছ, বক্সিং, ফুটবল, বেডমিণ্টন, চাইক্লিং, ফেন্সিং, হকী, জুডো, ৰ’য়িং, শ্বুটিং, সাঁতোৰ, টেবুল টেনিছ, ভাৰোত্তোলন আৰু মল্লযুঁজ প্রশিক্ষণৰ সুবিধা থাকিব৷