নিয়মীয়া বাৰ্তা ২০ অক্টোবৰঃ আই চি চি টি–২০ বিশ্বকাপত টীম ইণ্ডিয়াৰ হৈ ইনিংছ মুকলি কৰিব তাৰকা অ’পেনাৰ ৰোহিত শর্মা আৰু লোকেশ ৰাহুলে৷ অধিনায়ক বিৰাট কোহলিয়ে সোমবাৰে এই কথা ঘোষণা কৰে৷ বাঁওহতীয়া আক্রমণাত্মক বেটছমেন ঈশান কিশনে ৰোহিতৰ সৈতে টীম ইণ্ডিয়াৰ ইনিংছ মুকলি কৰিব বুলি শেহতীয়াকৈ বাতৰি প্রকাশ পাইছিল যদিও কালি ইংলেণ্ডৰ বিৰুদ্ধে খেলা প্রথমখন ৱার্মআপ মেচৰ পূর্বে টছৰ সময়ত কোহলিয়ে স্পষ্ট কৰে যে ৰাহুলে টি–২০ বিশ্বকাপত অ’পেনাৰৰ ভূমিকা পালন কৰিব৷
উল্লেখ্য যে সদ্যসমাপ্ত আই পি এলত পঞ্জাব কিংছৰ হৈ ইনিংছ মুকলি কৰি তাৰকাগৰাকীয়ে ৬২৮ ৰান সংগ্রহ কৰিবলৈ সক্ষম হৈছিল৷ প্রতিযোগিতাখনত তেওঁ সর্বাধিক ৩০টা ছিক্সাৰ কোবাই চমকপ্রদ ফর্ম প্রদর্শন কৰিছিল৷ ইফালে, টি–২০ বিশ্বকাপত কোহলিয়ে তিনি নম্বৰ স্থানত বেটিং কৰি থকা বুলিও তাৰকাগৰাকীয়ে জানিবলৈ দিয়ে৷ উল্লেখ্য যে প্রথম ৱার্মআপ মেচত দুর্দান্ত জয় সাব্যস্ত কৰা টীম ইণ্ডিয়াই কাইলৈ অষ্ট্রেলিয়াৰ বিৰুদ্ধে দ্বিতীয়খন ৱার্মআপ মেচ খেলিব৷