নিয়মীয়া বাৰ্তা ১১ আগষ্টঃ ব্রাজিলৰ তাৰকা খেলুৱৈ নেইমাৰ আৰু ফ্রান্সৰ কিলিয়ান এমবাপেৰ সৈতে একেলগে দেখা যাব আর্জেণ্টিনাৰ তাৰকা ফুটবলাৰ লি’নেল মেছিক৷ বার্চিলোনাৰে সুদীর্ঘ ২১ বছৰীয়া সম্পর্ক ছেদ হোৱাৰ পিছত পেৰিছ ছেইণ্ট জার্মেইনেৰে চুক্তিবদ্ধ হ’ল আর্জেণ্টিনাৰ ছুপাৰ ষ্টাৰ লি’নেল মেছি৷
বার্চিলোনা এৰাৰ পিছত পি এছ জিত চুক্তিবদ্ধ হ’ব বুলি বাতৰি ওলাইছিল যদিও সেই সন্দর্ভত মেছিয়ে কোনোধৰণৰ মন্তব্য আগবঢ়োৱা নাছিল৷ কিন্তু অৱশেষত আর্জেণ্টিনাৰ তাৰকা ফুটবলাৰগৰাকীৰ পিতৃয়ে সদৰী কৰে যে মেছিয়ে পেৰিছ ছেইণ্ট জার্মেইনৰ হৈ খেলিব৷
ফুটবলাৰগৰাকী দুবছৰৰ বাবে ক্লাবটোৰ সৈতে চুক্তিবদ্ধ হ’ব৷ ক্লাবটোৰ সৈতে চুক্তিবদ্ধ হোৱা লি’নেল মেছিয়ে প্রতি বছৰত ২৫৭ কোটি টকা লাভ কৰিব বুলি সংবাদ প্রতিষ্ঠানত সদৰী যদিও কিমান ধনৰ বিনিময়ত বার্চিলোনাৰ প্রাক্তন তাৰকা ফুটবলাৰগৰাকী পি এছ জিৰ সৈতে চুক্তিবদ্ধ হৈছে সেই সন্দর্ভত মেছিৰ পিতৃয়ে কোনোধৰণৰ মন্তব্য আগবঢ়োৱা নাই৷ পেৰিছ ছেইণ্ট জার্মেইনৰ সৈতে চুক্তিবদ্ধ হোৱাৰ বাবে মেছি আজি পেৰিছত উপস্থিত হয়৷ আর্জেণ্টিনাৰ তাৰকা খেলুৱৈগৰাকীয়ে পি এছ জিৰ সৈতে চুক্তিবদ্ধ হোৱাটো নিশ্চিত হোৱাৰ পিছত মেছিক বীৰোচিত আদৰণি জনোৱাৰ বাবে পেৰিছত অসংখ্য অনুৰাগীয়ে ভিৰ কৰা দেখা যায়৷
মেছিয়ে পেৰিছত উপস্থিত হৈ বগা টি–ছার্ট পিন্ধি অনুৰাগীসকলক অভিবাদন জনায়৷ বার্চিলোনাৰ প্রাক্তন খেলুৱৈগৰাকীৰ সৈতে পেৰিছ ছেইণ্ট জার্মেইনে এক পাঁচ বছৰীয়া চুক্তিত স্বাক্ষৰ কৰাৰ কথা আছিল যদিও আর্জেণ্টিনাৰ ছুপাৰষ্টাৰগৰাকীয়ে দুবছৰৰ বাবে পি এছ জিৰে চুক্তিবদ্ধ হোৱাৰ সিদ্ধান্ত গ্রহণ কৰে৷ উল্লেখ্য যে ছবাৰৰ বেলন ডি অ’ৰ বঁটা বিজয়ী ৩৪ বছৰীয়া মেছিয়ে বার্চিলোনাৰ হৈ অভিলেখসংখ্যক ৭৭৮খন মেচ খেলি ৬৮২টা গ’ল স্ক’ৰ কৰিবলৈ সক্ষম হৈছিল৷
মাত্র ১৩ বছৰ বয়সতে বার্চিলোনাৰ হৈ খেলা ৩৪ বছৰীয়া লি’নেল মেছিয়ে বার্চিলোনাৰ হৈ খেলি যোৱাৰ ইচ্ছা আছিল যদিও আর্থিক সংকটৰ বাবে ক্লাবটোৱে মেছিক চুক্তিবদ্ধ নকৰাৰ সিদ্ধান্ত গ্রহণ কৰিছিল৷