নিয়মীয়া বাৰ্তা, ৬ ফেব্ৰুৱাৰী : ৰোহিত শৰ্মা নেতৃত্বাধীন ভাৰতীয় দলটোৱে ৱেষ্ট ইণ্ডিজৰ বিৰুদ্ধে জয়েৰে অভিযান আৰম্ভ কৰিছে। আজি আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত প্ৰথমখন এদিনীয়া মেচত ভাৰতে ৬ উইকেটত বিজয় সাবস্ত কৰে। ভাৰতীয় দলটোৱে টছত জিকি প্ৰথমে বলিং কৰাৰ সিদ্ধান্ত লোৱাত ৱেষ্ট ইণ্ডিজৰ বেটিং বিপৰ্য়য় ঘটি মাত্ৰ ১৭৬ ৰানতে ইনিংছ সামৰে ৱেষ্ট ইণ্ডিজৰ হৈ জেছন হল্ডাৰে সৰ্বাধিক ৫৭ ৰান কৰে। ভাৰতৰ হৈ চাহালে ৪টা, ৱাশ্বিংটন সুন্দৰে ৩, প্ৰসিদ্ধ কৃষ্ণই ২টা আৰু চিৰাজে এটা উইকেট দখল কৰে। বিপৰীতে ১৭৭ ৰানৰ লক্ষ্য লৈ খেলিবলৈ আহি ৪টা উইকেট হেৰুৱাই বিজয় সাবস্ত কৰে। ভাৰতৰ হৈ অধিনায়ক ৰোহিত শৰ্মাই ৬০, সূৰ্যকুমাৰ যাদৱে ৩৪, দীপক হুদাই ২৬ ৰান কৰে।ঈশান কিষণে ২৮ ৰানৰ বৰঙণি যোগায়। বিৰাট কোহলি (৮) আৰু ঋষভ পণ্ট (১১) বৰ্থ হয়। ৱেষ্ট ইণ্ডিজৰ হৈ যোছেফে দুটা আৰু আকিল হোছেইনে এটা উইকেট দখল কৰে।