নিয়মীয়া বাৰ্তা, ২৭ আগষ্টঃ আই পি এলৰ বাবে ডুবাইত আজি অনুশীলন আৰম্ভ কৰিছে কিংছ একাদশ পঞ্জাব আৰু ৰাজস্থান ৰয়েলছে৷ যোৱা সপ্তাহত ডুবাইত উপস্থিত হোৱাৰ পিছত দলটোৰ খেলুৱৈ আৰু বিষয়ববীয়াসকলৰ বাধ্যতামূলক ছদিনৰ আইছ’লেচন আৰু তিনিটা ক’ভিড টেষ্ট সম্পন্ন হোৱাৰ পিছত তেওঁলোকে খেলপথাৰত নমাৰ অনুমতি লাভ কৰে৷
উল্লেখ্য যে কিংছ একাদশ পঞ্জাব আৰু ৰাজস্থান ৰয়েলছে যোৱা ২০ আগষ্টত ডুবাইত উপস্থিত হৈছিল৷ ডুবাইৰ প্রচণ্ড গ্রীষ্ম প্রবাহৰ বাবে দল দুটাই দিনৰ পৰিৱর্তে নিশাৰ ভাগতহে অনুশীলন চলোৱাৰ সিদ্ধান্ত লৈছে৷ ইফালে, কাইলৈৰ পৰা অনুশীলনত নামিব কলকাতা নাইট ৰাইডার্ছ৷ উল্লেখ্য যে অহা ১৯ ছেপ্ঢেম্বৰৰ পৰা ইউ এ ইৰ তিনিখন চহৰ ক্রমে ডুবাই, আবু ধাবি আৰু শ্বাৰজাহত আই পি এলৰ মেচসমূহ খেলোৱা হ’ব৷